सर्वसाधारण सभेचा सत्ताधाऱ्यांना धसका

जळगाव : जिल्हा परिषदेची सर्वसाधारण सभा येत्या २८ तारखेला होणार असून, या सभेत जिल्हा नियोजन समितीकडून प्राप्त झालेल्या निधीचे रखडलेले नियोजन, गत काळात ग्रामविकासासंबंधीच्या कामांमध्ये निधीचे झालेले असमान वाटप हे मुद्दे गाजण्याची शक्‍यता आहे. सत्ताधाऱ्यांमधील दुफळीचा लाभ विरोधक उचलून प्रशासनाची कोंडी करण्याची तयारी विरोधक करीत आहेत.

ही सभा उज्ज्वला पाटील यांच्या अध्यक्षतेखाली जिल्हा परिषदेतील छत्रपती शाहू महाराज सभागृहात दुपारी दोन वाजता होईल. प्रशासनाने काही सत्ताधाऱ्यांच्या दबावात भजनी मंडळांना साहित्य वाटप, शाळांमध्ये पॉलीबाकांचा पुरवठा यासंबंधीच्या निविदांमध्ये गडबड करायचा, निविदा लटकवून ठेवायचा प्रयत्न मागील पाच सहा महिने केला आहे. हे मुद्देदेखील चर्चेत असून, विरोधक आवाज उठवतील, असे संकेत मिळत आहेत.

जिल्हा परिषदेत सत्ताधाऱ्यांनी ग्रामविकासासंबंधी निधीचे वाटप करताना कमी अधिक निधी दिला. काही सदस्यांना तो अत्यल्प मिळाला. अमळनेर, पारोळा, पाचोरा व जळगाव तालुक्‍यात असमान निधी वाटपाच्या तक्रारी अधिक आहेत. जिल्हा परिषदेतील सत्ताधाऱ्यांमधील एका गटातील सदस्यांनाही निधी देताना दुजाभाव झाल्याचा दावा केला जात आहे. यावरूनही सत्ताधाऱ्यांमध्ये रणकंदन होऊ शकते.

सभेत नियमित १३ विषय मंजुरीसाठी घेतले आहेत. या व्यतिरिक्त काही महत्त्वाचे विषय ऐनवेळी मंजुरीसाठी घेतले जाऊ शकतात. परंतु काही आर्थिक विषय, घोरणात्मक विषय आयत्या वेळी मंजुरीसाठी सत्ताधाऱ्यांनी ठेवल्यास ते नाकारण्याची भूमिका विरोधक घेत असून, सत्ताधाऱ्यांचा विश्‍वास त्यासाठी कसा मिळवायचा याची तयारी सुरू आहे. दुसरीकडे प्रशासन व पदाधिकारी यांच्यात सभेतील विषय व सध्या चर्चेत असलेले मुद्दे यावर चर्चा झाली असून, सभा शांततेत पार पाडण्यासंबंधीची तयारी सुरू आहे.