सात हजार जलस्रोतांचे होणार चंद्रपूर जिल्ह्यात 'जिओ टॅगिंग'

चंद्रपूर ः ग्रामपंचायत क्षेत्रातील सार्वजनिक पिण्याच्या स्रोतांचे सॅटेलाईट टॅगिंग करण्यात येणार आहे. त्यानुसार येत्या ३१ डिसेंबरपर्यंत सात हजारांपेक्षा अधिक स्रोतांचे पाणी नमुने गोळा करण्यात येतील, अशी माहिती सूत्रांनी दिली.  जिल्हा परिषदेच्या पाणी व स्वचछता मिशन कक्षाच्या वतीने दरवर्षी पावसाळ्यापूर्वी आणि नंतर स्वच्छता सर्व्हेक्षण कार्यक्रम जैविक तपासणी अभियान राबविल्या जाते. सद्य:स्थितीत जिल्ह्यात सुमारे ८ हजार जलस्रोत आहेत. या सर्व स्रोतांची तपासणी या अभियानाअंतर्गत केली जाणार आहे. या अभियानाची सुरवात मंगळवार (ता. १) पासून झाली. रासायनिक पाणी नमुने तपासणी अभियानाचे काम जिल्ह्यात १०० टक्‍के पूर्ण करण्यात यावे, अशा सूचना मुख्य कार्यकारी अधिकाऱ्यांनी दिल्या आहेत. जलसुरक्षकांनी ग्रामपंचायत परिसरातील सर्व सार्वजनिक पिण्याच्या पाण्याच्या स्रोतांचे नमुने ग्रामसेवक, आरोग्यसेवक, आरोग्य सहायकांच्या सहकार्याने जिओ फेन्सिंग मोबाईल ॲपव्दारे गोळा करावयाचे आहेत.  या पाणी नमुन्याची रासायनिक तपासणी, भूजल सर्व्हेक्षण आणि विकास यंत्रणांच्या उपविभागीय प्रयोगशाळांतून करण्यात येणार आहे. या अभियानाबरोबरच जिल्ह्यातील सर्व सार्वजनिक पिण्याच्या पाण्याच्या स्रोतांचे स्वच्छता सर्व्हेक्षण १ ते ३१ ऑक्‍टोबर या कालावधीत आरोग्य विभागाकडून केल्या जाईल. त्याकरिता प्रपत्र अ, ब, क संबंधीत आरोग्य कर्मचाऱ्यांना पुरविण्यत आले असून त्याव्दारे स्रोतांचा परिसर, बोअरवेलमधील गळती, पाणी शुध्दीकरणबाबतची प्रत्यक्ष पाहणी करून आलेल्या जोखमीप्रमाणे ग्रामपंचायतीला पाणी गुणवत्तेविषयी जोखीम निश्चि‍त करण्यात येणार आहे. त्या आधारे ग्रामपंचायतींना लाल, पिवळे व हिरवे कार्ड देण्यात येणार आहे.  असे होते टॅगिंग स्रोतांच्या १७ मिटर परिसरात गेल्यावर ॲप सुरू करून त्याव्दारे स्रोत जिओ टॅग केल्या जाते. त्यानंतर छायाचित्रासह नमुना घेतला जातो. याव्दारे जिल्ह्यातील पाणीसाठ्याची एकंदरीत स्थिती कळण्यास मदत होते. पाण्याची तपासणीदेखील यातून शक्‍य होत असल्याने दूषित पाण्याचे स्रोत कळून आवश्‍यक त्या उपाययोजनाही करणे शक्‍य होते.