गिरणा धरणाचा साठा ६५ टक्‍क्‍यांवर

जळगाव ः गिरणा धरणाचा साठा वाढत असून, तो गुरुवारी (ता. ८) सकाळी सहा वाजता ५६.१६ टक्‍क्‍यांपर्यंत होता. या धरणात नाशिक भागातील हरणबारी, केळझर प्रकल्प, ठेंगोडा बंधाऱ्यातून पाण्याचा विसर्ग सुरू असून, गिरणाचा साठा आणखी वाढण्याची शक्‍यता आहे.  तापी नदीवरील मुक्ताईनगरनजीकच्या हतनूर प्रकल्पाचे २४ दरवाजे गुरुवारी सकाळी सहा वाजता पूर्ण उघडण्यात आले. सातपुडा पर्वत भागातील सुकी नदीला चांगले प्रवाही पाणी आले आहे. तसेच तापी नदीची पूरस्थिती कायम आहे. कुठेही शेती व गावांमध्ये पाणी शिरल्याने नुकसान झालेले नसल्याची माहिती मिळाली. तापी नदीवरील धुळे जिल्ह्यातील सुलवाडे बॅरेजचे २६, नंदुरबारमधील सारंगखेडा बॅरेजचे २६ व प्रकाशा बॅरेजचे २७ दरवाजे पूर्ण उघडण्यात आले आहेत. जळगाव जिल्ह्यातील गिरणा, वाघूर, अंजनी आदी नद्यांना पूर आलेला नाही. धुळे जिल्ह्यातील पांझरा प्रकल्प १०० टक्के भरल्याने त्यातून विसर्ग सुरू असून, नदीला पूर आला आहे. सातपुडा पर्वत भागातील सुकी प्रकल्पातील सांडव्यातून पाणी सोडण्यात आले आहे. हा प्रकल्प १०० टक्के भरेल, असे सांगण्यात आले. तर अभोरा, मंगरूळ हे प्रकल्पही १०० टक्के भरतील, अशी स्थिती आहे. यावलमधील मोर धरणाचा साठाही वाढला असून, धुळे जिल्ह्यातील सातपुडा पर्वतालगतच्या अनेर प्रकल्पाचे १० दरवाजे उघडल्याने नदीला पूर आला आहे.

विविध प्रकल्पांमधील साठा (टक्केवारी, गुरुवारी सकाळी सहापर्यंत)  गिरणा ५६.१६,  वाघूर ३२.६२, अभोरा ७६, गूळ ५०.४३, सुकी ५८.४१, मंगरूळ ६५.४९. जळगाव जिल्ह्यातील तोंडापूर, धुळ्यातील पांझरा, जामखेडी, बुराई, नंदुरबारमधील दरा व रंगावली हे प्रकल्प १०० टक्के भरले आहेत.