सोलापूर ः शेतकऱ्यांची कर्जमाफी प्रक्रिया पूर्ण करुन नवीन पीककर्ज द्यावे, शेतीपंपाचे वीजबिल माफ करावे, ऊसखरेदी दरात वाढ करावी, यासह विविध मागण्यांसाठी रयत क्रांती शेतकरी संघटनेच्या वतीने लवकरच पुन्हा आंदोलन करण्यात येणार आहे, अशी माहिती प्रदेश कार्याध्यक्ष दीपक भोसले यांनी दिली.
दुष्काळ, गारपीठ आणि लॅाकडाऊनमुळे शेतकरी आर्थिक संकटात आहे. अशा काळात शेतकऱ्यांना मदत करण्याची गरज आहे. परंतु, सरकारने अद्याप कोणतीही भरीव अशी मदत केली नाही. या पार्श्वभूमीवर शेतकऱ्यांना न्याय मिळवून देण्यासाठी आम्ही आंदोलन करणार आहोत. लॅाकडाऊनने बाजारपेठा बंद आहेत. त्याचा परिणाम शेतमाल विक्रीवर होतो आहे. आहे तिथे विकावा, तरी दर मिळत नाही, अशा कोंडीत शेतकरी अडकला आहे. या परिस्थितीत शेतकऱ्यांना थेट मदतीची गरज आहे, अशी मागणी भोसले यांनी केली.
जाहीर केलेल्या कर्जमाफीचा लाभही अनेक शेतकऱ्यांना मिळालेला नाही. मिळालेला आहे त्यांना नवीन कर्जही मिळालेले नाही. यावर तातडीने निर्णय व्हावा, शेतीपंपाचे वीजबिल माफ करावे, बाजार समित्यांमध्ये लिलाव सुरु करावे, आदी आमच्या मागण्या आहेत. सध्या या सर्व प्रश्नावर आंदोलनाची भूमिका आम्ही घेतली आहे. लवकरच राज्यभर आम्ही हे आंदोलन छेडू, असेही भोसले म्हणाले.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.