शेतकऱ्यांना सन्मानपूर्वक कर्जमुक्तीचा लाभ द्या ः जिल्हाधिकारी पापळकर

अकोला ः शेतकरी कर्जदार नसून तो भूमीचा राजा आहे. देशाचा अन्नदाता आहे. ही भूमिका लक्षात ठेऊन महात्मा जोतिराव फुले शेतकरी कर्जमुक्ती योजना राबवावी. शेतकऱ्यांना सन्मानाची वागणूक देऊन कर्जमुक्तीचा लाभ शेतकऱ्यांपर्यंत पोचावा, असे आवाहन जिल्हाधिकारी जितेंद्र पापळकर यांनी केले. महात्मा जोतिराव फुले शेतकरी कर्जमुक्ती योजना राबविण्यासाठी शेतकरी सभासदांचे आधार प्रमाणीकरण करून घेण्याबाबत, बँकेचे निरीक्षक व गटसचिव यांचा प्रशिक्षण कार्यक्रम अकोला जिल्हा मध्यवर्ती सहकारी बँकेच्या वतीने घेण्यात आला. या कार्यक्रमाचे उद्‍घाटक म्हणून जिल्हाधिकारी जितेंद्र पापळकर बोलत होते. शेतकरी सभासदांना या कर्जमुक्ती योजनाचा लाभ पोचविण्याकरिता आधार प्रमाणीकरण करून घेणे अत्यंत महत्त्वाचे असून, अकोला जिल्हा मध्यवर्ती सहकारी बँकेच्या सर्व शाखा व विविध कार्यकारी सहकारी संस्थांचे गटसचिव यांच्याकडे आधार प्रमाणीकरण व्यवस्था करण्यात आली आहे.  शेतकरी सभासदांनी बँकेचे निरीक्षक, गटसचिव, आपले सरकार पोर्टल सेवा केंद्र किंवा स्वस्त धान्य दुकान येथे संपर्क करून आधार प्रमाणीकरण करून महात्मा जोतिराव फुले शेतकरी कर्जमुक्ती योजनेचा लाभ घ्यावा, असे आवाहन जिल्हाधिकाऱ्यांनी केले आहे. या प्रसंगी अध्यक्ष डॉ. संतोषकुमार कोरपे यांनी शेतकऱ्यांना सन्मान देऊन, बँकेचे निरीक्षक व सेवा सहकारी संस्थांचे गटसचिव आधार प्रमाणीकरणाचे काम युद्धपातळीवर करतील व महात्मा जोतिराव फुले शेतकरी कर्जमुक्ती योजनेचा लाभ संपूर्ण पात्र शेतकऱ्यांपर्यंत पोचवतील, अशी ग्वाही दिली. कार्यक्रमाचे प्रास्ताविक बँकेचे मुख्य कार्यकारी अधिकारी अनंत वैद्य यांनी केले. सूत्रसंचालन शरद वानखडे यांनी केले तर, जी. एस. पाटील यांनी आभार मानले.