बुलडाणा : अमरावती विभागीय आयुक्तांच्या निर्देशानुसार कोरोना नियंत्रणासाठी अंशतः लॉकडाऊनची घोषणा करण्यात आली आहे. यामध्ये दूध वितरणासाठी दूध उत्पादक शेतकरी आणि डेअरी व्यावसायिकांसाठी देण्यात आलेली वेळ अडचणीची आहे, वेळ वाढवून द्यावी, अशी मागणी स्वाभिमानी शेतकरी संघटनेने केली आहे. संघटनेचे नेते रविकांत तुपकर यांनी जिल्हाधिकारी एस. राममूर्ती यांची भेट घेऊन या बाबत शेतकऱ्यांच्या अडचणी कानावर घातल्या आहेत.
तुपकर यांच्यासह दूध उत्पादक शेतकऱ्यांच्या शिष्टमंडळाने जिल्हाधिकारी राममूर्ती यांची भेट घेतली. आयुक्त पियुष सिंग यांच्याशीही चर्चा केली. लॉकडाऊनच्या काळात सकाळी नऊ ते दुपारी पाच, अशी वेळ ठरवून दिली आहे. या ठरवून दिलेल्या वेळेत दूध वितरण करणे शक्य नाही. त्यामुळे शेतकऱ्यांचे आणि डेअरी व्यावसायिकांचे मोठ्या प्रमाणात नुकसान होणार आहे.
वेळेची मर्यादा सकाळी सहा ते रात्री दहापर्यंत वाढवून मिळावी, अशी मागणी करण्यात आली आहे. शेतकऱ्यांना दूध साठवणुकीची अडचण आहे. तसेच गायींच्या आणि म्हशींच्या कासेत फारकाळ दूध ठेवू शकत नाही.
त्यामुळे प्रशासनाने घालून दिलेल्या वेळेत दूध उत्पादक शेतकऱ्यांना आणि डेअरी व्यावसायिकांना दूध वाटप आणि वितरण करणे शक्य नाही. त्यामुळे वितरण वेळेत बदल करण्याची मागणी केली आहे. शेतकऱ्यांशी केलेल्या चर्चेनंतर जिल्हाधिकाऱ्यांनी या प्रश्‍नावर मार्ग काढणार असल्याची ग्वाही दिली आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.