सोलापुरात गवार प्रतिक्विंटल २००० ते ३५०० रुपये

सोलापूर ः सोलापूर कृषी उत्पन्न बाजार समितीच्या आवारात बुधवारी (ता. १९) गवार, भेंडीची आवक कमी राहिली, पण उठाव चांगला असल्याने दरातील तेजी कायम राहिल्याचे बाजार समितीच्या सूत्रांकडून सांगण्यात आले. 

बाजार समितीच्या आवारात बुधवारी गवारची ३ ते ५ क्विंटल आणि भेंडीची २ ते ४ क्विंटल इतकी कमी आवक झाली. पण मागणी असल्याने दरातील तेजी टिकून राहिली. गवार, भेंडीची आवक स्थानिक भागातूनच झाली. गवारला प्रतिक्विंटलला किमान २००० रुपये, सरासरी ३५०० रुपये आणि कमाल ४५०० रुपये तर भेंडीला किमान २२५० रुपये, सरासरी २८०० रुपये आणि कमाल ४००० रुपये असा दर मिळाला.

गेल्या काही दिवसांपासून त्यांच्या दरातील तेजी टिकून आहे. बुधवारी पुन्हा ही तेजी कायम राहिली. त्याशिवाय हिरवी मिरची, ढोबळी मिरची यांचेही दर टिकूनच होते. त्यात हिरव्या मिरचीची आवक १० ते २० क्विंटल आणि ढोबळी मिरचीची आवक ५० ते १०० क्विंटलपर्यंत झाली. पण मागणीत काहीसा चढ-उतार राहिला. तरीही दर टिकून होते.

हिरव्या मिरचीला प्रतिक्विंटल किमान ८०० रुपये, सरासरी १००० रुपये आणि कमाल १८०० रुपये आणि ढोबळी मिरचीला किमान ६०० रुपये, सरासरी ९०० रुपये आणि कमाल १५०० रुपये असा दर मिळाला. 

भाजीपाल्यामध्ये मेथी, शेपू, कोथिंबिरीची आवक प्रत्येकी ७ ते ८ हजार पेंढ्यांपर्यंत झाली. त्यात मेथीला प्रतिशंभर पेंढ्यासाठी ४०० ते ७०० रुपये, कोथिंबिरीला ३०० ते ६०० रुपये आणि शेपूला ३०० ते ५०० रुपये असा दर मिळाला.