नुकसान भरपाई देण्यास सरकार कटिबद्ध : सत्तार

औरंगाबाद  : ‘‘आता झालेल्या पावसाने शेतकऱ्यांची सर्व पिके , घरे आदींचे मोठ्या प्रमाणात नुकसान झाले आहे. याबाबत तत्काळ पंचनामे करण्याचे निर्देश संबंधितांना दिले आहेत. झालेल्या नुकसानीची भरपाई शासन लवकरच नियमाप्रमाणे देण्यासाठी कटिबद्ध आहे,’’ असे प्रतिपादन महसूल राज्यमंत्री अब्दुल सत्तार यांनी केले.

वैजापूर येथील पंचायत समिती सभागृहात मंगळवारी (ता. २९) ‘माझे कुटुंब माझी जबाबदारी मोहिम’ अंमलबजावणी आणि पावसामुळे झालेल्या शेतपिकांचे नुकसान, याबाबत आढावा बैठक झाली. त्यात सत्तार बोलत होते. खासदार इम्तियाज जलील, आमदार प्रा. रमेश बोरणारे, उदयसिंह राजपूत,  जिल्हा परिषद आरोग्य सभापती अविनाश गलांडे,  जिल्हाधिकारी सुनील चव्हाण, जिल्हा अधीक्षक  कृषी अधिकारी डॉ. तुकाराम मोटे, उपविभागीय अधिकारी अण्णासाहेब शिंदे, तसिलदार निखील धूळधर आदींची उपस्थिती होती.

सत्तार म्हणाले, ‘‘कोरोना विषाणूचा प्रादुर्भाव रोखण्यासाठी मुख्यमंत्री उद्धव ठाकरे यांच्या संकल्पनेतील ‘‘माझे कुटुंब माझी जबाबदारी मोहिम सर्वांनी प्रयत्नपूर्वक यशस्वी करावी. तालुक्यातील रुग्णांचा बरा होण्याचा दर ८९ टक्के आहे. तो अधिक वाढवून वैजापूर तालुका कोरोनामुक्त करण्याच्या दृष्टीने सर्व यंत्रणांनी कार्य करावे.’’ 

खासदार जलील यांनी वैजापूर तालुक्यातील आरोग्य यंत्रणेच्या कार्याबाबत समाधान व्यक्त केले. अडचणी असतील त्या कळवाव्या, असे आवाहन यंत्रणेला केले. जिल्हाधिकारी चव्हाण यांनी शेतपिकांचे नुकसान झाले आहे, त्याबाबतचा वस्तुनिष्ठ अहवाल लवकरच तयार करून शासनास सादर करण्यात येईल. उर्वरित पंचनामे लवकरच पूर्ण करण्यात येतील, असे  सांगितले. तसेच मास्क वापरण्याबाबत सर्वांनी जागृती करण्याचे आवाहन केले.