जळगाव : खानदेशातील प्रमुख बाजार समित्यांमध्ये देशी हरभऱ्याच्या दरात सुधारणा झाली आहे. यामुळे शासकीय खरेदीसंबंधी ऑनलाइन नोंदणीला शेतकऱ्यांकडून फारसा प्रतिसाद मिळत नसल्याची स्थिती आहे.
ऑनलाइन नोंदणी गेल्या आठवड्यात सुरू झाली आहे. जळगाव जिल्ह्यात दहा, धुळ्यात चार, नंदुरबारात चार खरेदी केंद्र सुरू केले जाणार आहेत. या १८ केंद्रांमध्ये फक्त ५०० शेतकऱ्यांची ऑनलाइन नोंदणी हरभरा विक्रीसंबंधी झाली आहे. जळगाव जिल्ह्यात अमळनेर, पारोळा, पाचोरा, जळगाव, चोपडा, जामनेर, बोदवड, रावेर, यावल, मुक्ताईनगर, भडगाव येथे खरेदी केंद्र सुरू केले जाणार आहेत. जळगाव जिल्ह्यातही प्रतिसाद कमीच आहे.
जळगाव जिल्ह्यात रब्बीमध्ये हरभऱ्याची पेरणी सुमारे ८० हजार हेक्टर क्षेत्रात झाली आहे. हरभऱ्याचे दर सुरवातीला ४ हजार ते ४ हजार २०० रुपये प्रतिक्विंटल, असे होते. त्यात या महिन्याच्या दुसऱ्या आठवड्यात सुधारणा सुरू झाली. आवक वाढली, तशी दरात सुधारणादेखील दिसत आहे. दर हमीभावापर्यंत पोचल्याची स्थिती असल्याने शासकीय खरेदीसंबंधीच्या ऑनलाइन नोंदणीला शेतकऱ्यांचा कमी प्रतिसाद आहे.
जळगाव जिल्ह्यात चोपडा, अमळनेर येथील बाजार हरभऱ्यासाठी प्रसिद्ध आहे. धुळ्यात शिरपूर व नंदुरबारात शहादा व तळोदा बाजारात हरभऱ्याची अधिकची आवक सुरू आहे. देशी, देशी सुधारित प्रकारच्या हरभऱ्याला प्रतिक्विंटल ४ हजार २०० ते ४ हजार ६०० रुपये प्रतिक्विंटलचा दर मिळत आहे.
चोपडा व अमळनेर येथील बाजारात गेल्या चार दिवसांत मिळून प्रतिदिन सरासरी तीन हजार क्विंटल हरभऱ्याची आवक झाली आहे. जळगाव येथील बाजारातही आवक वाढू लागली आहे. शिरपूर येथील बाजारातही प्रतिदिन सरासरी दोन हजार क्विटल हरभऱ्याची आवक झाली आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.