उद्योजकांच्या कर्जमाफीसाठी सरकारची मदत : शरद पवार

अकलूज, जि. सोलापूर : ‘‘देशातील काही श्रीमंत उद्योजकांनी ८१ हजार कोटीचे कर्ज थकविले. त्यामुळे बॅंकांची स्थिती बिकट झाली म्हणून सरकारने रिझर्व्ह बॅंकेकडून घेऊन ते पैसे भरले; परंतु या सरकारला शेतकऱ्यांचे कर्ज माफ करण्यासाठी पैसे नाहीत; पण आता कर्जमाफीचा दावा करतायेत, कुठे आहे आणि किती झाली आहे कर्जमाफी,’’ असा सवाल राष्ट्रवादी काँग्रेसचे अध्यक्ष शरद पवार यांनी मंगळवारी (ता.१५) अकलूज (ता. ळशिरस) येथे केला. 

अकलूज येथील श्रीराम मंदिर परिसरात माळशिरस विधानसभा मतदारसंघातील राष्ट्रवादी काँग्रेसचे उमेदवार उत्तमराव जानकर यांच्या प्रचारार्थ आयोजित सभेत पवार बोलत होते. सुभाष पाटील, डॉ. धवलसिंह मोहिते-पाटील, आमदार रामहरी रूपनवर, उमेदवार उत्तमराव जानकर, माढा मतदारसंघाचे उमेदवार बबनराव शिंदे उपस्थित होते. 

पवार म्हणाले, ‘‘राज्यात शेतकरी आत्महत्या करीत आहेत. राज्य सरकारच्या धोरणांमुळे तरुण बेरोजगार होत आहेत. या सरकारचे धोरण शेतकरी व कामगारांसाठी नसून मूठभर लोकांसाठी आहे. अशा लोकांच्या हातात पुन्हा सत्ता देऊ नका. मुख्यमंत्री कुस्तीसाठी पुढे पैलवान नसल्याची भाषा करतात; परंतु आपण कुस्ती परिषदेचे अध्यक्ष असून नवीन पैलवान तयार करीत असतो. शिवाय लढतीला पुढे कोण नाही, तर मग केंद्रीय गृहमंत्री, पंतप्रधान व अनेक राज्यांचे मुख्यमंत्री या राज्यात कशासाठी येतात.’’ 

‘‘गेली पाच वर्षे सत्तेत आहात. त्यात काय दिवे लावले ते सांगा. आम्ही अनेक लोकोपयोगी निर्णय घेतले. महिला आरक्षणाचा पहिला निर्णय आम्ही घेतला. शेतकऱ्यांचे दुखणे समजत नसलेले सरकार असून आतापर्यंत १६ हजार शेतकऱ्यांनी आत्महत्या केल्या. हे सरकार शिवाजी महाराजांच्या नावाने मत मागून सत्तेवर आले. अरबी समुद्रात शिवस्मारक उभे करण्याची घोषणा केली. गेल्या चार वर्षांत एक वीटही तिथे बसवली नाही. उलट आमची अस्मिता असलेल्या किल्ल्यावर हॉटेलसह सर्व सुविधा अगदी छमछमचीही सुविधा देणार आहेत,’’ अशी टीकाही पवार यांनी केली.