पुणे जिल्ह्यात नुकसानग्रस्त डाळिंब बागांचे पंचनामे करण्यास टाळाटाळ

पुणे ः जिल्ह्यातील बहुतांशी भागांत पावसामुळे पिकांचे मोठे नुकसान झाले. द्राक्षे, डाळिंब, सीताफळ या फळपिकांनाही पावसाने मोठा फटका बसला आहे. त्यासाठी पंचनामे करण्याचे आदेश दिले असले तरी शासकीय अधिकारी व कर्मचारी डाळिंब बागांचे पंचनामे करण्यास टाळटाळ करत असल्याची माहिती अखिल महाराष्ट्र डाळिंब उत्पादन व संशोधन संघाचे विभागीय अध्यक्ष अतुल शिंगाडे यांनी दिली.

गेल्या दहा ते बारा दिवस जिल्ह्यातील अनेक भागांत जोरदार पाऊस झाला. यामुळे भात, बाजरी, सोयाबीन, भाजीपाला यासह फळपिकांचे मोठे नुकसान झाले. त्यानंतर अनेक ठिकाणी स्थानिक लोकप्रतिनिधींनी शेतकऱ्यांच्या बांधावर जाऊन पाहणी करत तातडीने पंचनामे करण्याचे आदेश दिले. प्रशासनानेही त्याची दखल घेत पंचनामे करण्यास सुरुवात केली. 

सोमवारी (ता. ४) पुण्याचे पालकमंत्री चंद्रकांत पाटील यांनी पुरंदर तालुक्यातील अनेक शेतकऱ्यांच्या शेतावर जाऊन प्रत्यक्ष पाहणी करीत पिकांचे पंचनामे करण्याचे आदेश दिले. मात्र, हे आदेश तोंडी असून, लेखी आदेश असल्याशिवाय तालुक्यातील ग्रामसेवक, तलाठी, कृषी सहायक हे डाळिंब पिकाचे पंचनामे करत नसल्याचे चित्र आहे. 

अतुल शिंगाडे म्हणाले, की माझ्याकडे जवळपास ६० ते ७० एकरांवर फळबाग आहे. यामध्ये डाळिंबाचे क्षेत्र जवळपास ४० ते ५० एकर आहे. गेल्या आठवड्यात झालेल्या अति पावसामुळे डाळिंबाला काळे डाग पडले असून, मोठे नुकसान झाले आहे. यासंदर्भात स्थानिक कृषी सहायक, तलाठी, ग्रामसेवक, तालुका कृषी अधिकारी यांना माहिती दिली. परंतु, अधिकारी द्राक्षे, बाजरी, भाजीपाला पिकांचे पंचनामे करत असून डाळिंब पिकाचे पंचनामे करत नसल्याचे चित्र आहे. त्यासंदर्भात विचारले असता ते म्हणाले, की लेखी आदेश नसल्याने आम्ही डाळिंबाचे पंचनामे करत नाही. परंतु प्रत्यक्षात जिल्हाधिकारी व मंत्र्यांनी सरसकट पंचनामे करण्याचे आदेश दिले आहेत. याबाबत तहसीलदारांना निवेदन दिले असून, पंचनामे करू, एवढेच ते सांगत आहे. जिल्हा अधीक्षक कृषी अधिकारी, वरिष्ठ अधिकाऱ्यांनाही याची पूर्व कल्पना दिली तरीही कोणाकडूनही प्रतिसाद मिळत नाही. सर्वच डाळिंब उत्पादकांची ही स्थिती आहे. त्यामुळे तातडीने नुकसानग्रस्त डाळिंबाचे पंचनामे करावेत, अशी आमची मागणी आहे.