परभणीतील शासकीय दूध संकलन यंत्रणा तोकडी

परभणी ः सततचा दुष्काळ, नापिकीमुळे शेतकरी दूध व्यवसायाकडे वळत असल्यामुळे शासकीय दूध योजनेअंतर्गत परभणी येथील शासकीय दुग्धशाळेतील दूध संकलनात महिन्यागणिक वाढ होत आहे; परंतु संकलन यंत्रणा तसेच दुग्धशाळेतील उपलब्ध प्रक्रिया यंत्रसामग्री तोकडी पडत आहे. अतिरिक्त ठरल्यामुळे दूध नाकारले जात आहे. त्यामुळे दूध उत्पादकांच्या अडचणी वाढल्या आहेत. गतवर्षीच्या (२०१७) सप्टेंबरच्या तुलनेत यंदाच्या सप्टेंबर महिन्यात सुमारे तिपटीने वाढ झाली आहे.

यंदाच्या सप्टेंबर महिन्यात एकूण ११ लाख ७९ हजार २४ लिटर दूध संकलन झाले. सध्या शासकीय दूध योजनेअंतर्गत परभणी येथील दुग्धशाळेतील परभणी, हिंगोली, नांदेड या तीन जिल्ह्यांतून प्रतिदिन सरासरी ३९ हजार लिटर दूध संकलन होत आहे. २०१७ च्या सप्टेंबरमध्ये प्रतिदिन सरासरी १४ हजार ९७८ लिटर याप्रमाणे महिनाभरात एकूण ४ लाख ४९ हजार ३४० लिटर दूध संकलन झाले होते. या वर्षीच्या सप्टेंबरमध्ये प्रतिदिन सरासरी ३९ हजार ३०४ लिटर याप्रमाणे महिनाभरामध्ये ११ लाख ७९ हजार १२४ लिटर दूध संकलन झाले. गतवर्षीच्या सप्टेंबरच्या तुलनेत दूध संकलन तिपटीने वाढल्यामुळे विविध ठिकाणची दूध शीतकरण केंद्र; तसेच मध्यवर्ती दुग्धशाळेतील यंत्रसामग्री अपुरी पडत आहे.

जिल्हा दूध विकास अधिकारी कार्यालयाअंतर्गत १२६ दूध उत्पादक सहकारी संस्था कार्यरत आहेत. ६० ते ६५ दूध उत्पादक संस्थांची नोंदणी प्रलंबित आहे. दुग्धशाळेत प्रतिदिन २० हजार लिटर दुधाचे पाश्चेरायझेशन करणे शक्य आहे. काही वर्षांपूर्वी येथील दुग्धशाळेतील दूध संकलन २ हजार लिटरपर्यंत घसरले होते. त्यामुळे मनुष्यबळ कमी करण्यात आले होते.