शेतकऱ्यांना अनुदानावर सेफ्टी किटचा पुरवठा

यवतमाळ  ः दोन वर्षांपूर्वी जिल्ह्यात फवारणीदरम्यान विषबाधेच्या घटना घडल्या होत्या. त्यांची दखल घेत या वर्षीच्या हंगामात शेतकऱ्यांना ९० टक्‍के अनुदानावर सुरक्षा साहित्याचा (सेफ्टी किट) पुरवठा केला जात आहे. अनुदानाची रक्‍कम थेट शेतकऱ्यांच्या खात्यात जमा करण्यात येणार असून, शेतकऱ्यांनी या योजनेचा लाभ घेण्याचे आवाहन पांढरकवडा तालुका कृषी अधिकारी गोपाळ शेरखाने यांनी केले आहे. दोन वर्षांपूर्वी जिल्ह्यात बीटी कापसावर बोंड अळीचा प्रादुर्भाव झाला होता. या किडीच्या नियंत्रणाकरिता शेतकऱ्यांनी शिफारशीत नसणाऱ्या कीडनाशकांचे मिश्रण करून फवारणी केली. या वेळी सुरक्षा साधने वापरण्याकडे दुर्लक्ष करण्यात आले. परिणामी, शेतकरी, शेतमजुरांना विषबाधा होण्याच्या घटना घडल्या. यामुळे हजारांवर शेतकरी, शेतमजुरांना रुग्णालयात दाखल करण्यात आले. यातील १८ जणांचा मृत्यू झाला. या घटनेनंतर गेल्या वर्षभरापासून कृषी विभागाकडून सुरक्षीत फवारणी संदर्भाने व्यापक जागृती अभियान राबविले जात आहे. याअंतर्गत ९० टक्‍के अनुदानावर सेफ्टी किटचा पुरवठादेखील करण्यात येत आहे. पांढरकवडा उपविभागीय कृषी अधिकारी जगन राठोड, तालुका कृषी अधिकारी गोपाळ शेरखाने यांनी सेफ्टी किट वापराबाबत जनजागृती अभियान राबविले.  सेफ्टी किटसाठी लागणारे दस्तऐवज कृषी सेवा केंद्रात आधार कार्ड तसेच पासबुकची झेरॉक्‍स अनुदानावरील सेफ्टी किट खरेदीसाठी द्यावी लागते. संबंधित दुकानदाराकडून बिल व शेतकऱ्यांचे दस्तऐवज सादर केल्यानंतर अनुदान शेतकऱ्यांच्या खात्यावर जमा होते. संरक्षक किटची कमाल किंमत ३५० रुपये निश्‍चित करण्यात आली आहे.