अतिरिक्त दूध शासन खरेदी करणार 

पुणे: राज्यातील दूध उत्पादक शेतकऱ्यांना दिलासा देण्यासाठी १० लाख लीटर दूध २५ रुपये दराने खरेदी करण्याचा निर्णय राज्य शासनाने घेतला आहे. या योजनेतून खासगी दूध प्रकल्पांना वगळण्यात आले आहे.  कोरोनाच्या पार्श्वभूमीवर राज्यातील दुधाची खरेदी घटली आहे. अडचणीत आलेल्या शेतकऱ्यांकडून पुढील दोन महिन्यांसाठी दररोज दहा लाख लीटर दूधाची २५ रुपये प्रतिलीटर दराने खरेदी करेल, असा निर्णय राज्य शासनाने घेतला आहे.  खासगी उद्योगांच्या म्हणण्यानुसार, ‘‘राज्यात रोज १२ लाख लीटर दूध अतिरिक्त ठरत असल्याचा सरकारचा अंदाज चुकीचा आहे. या दुधापैकी फक्त १० लाख लीटर दूध केवळ सहकारी दूधसंस्थांच्या माध्यमातून शासन २५ रुपये प्रतिलीटर दराने खरेदी करणार आहे. मुळात राज्यात ७८ टक्के दूध खरेदी खासगी प्रकल्प करीत आहेत. त्यामुळेच शेतकऱ्यांना दर मिळतो आहे’’  ‘‘कोरोनाच्या स्थितीनंतर अतिरिक्त दूध ३५ लाख लिटरपेक्षाही पुढे आहे. खासगी व सहकारी संस्थांच्या पावडर प्रकल्पांमध्ये सध्या ६० लाख लिटरपेक्षाही जादा दुधावर प्रक्रिया केली जात आहे. त्यामुळे केवळ दहा लाख लीटर दूध जादा असल्याचे सांगून अनुदान योजना राबविणे चूक आहे,’’ असे खासगी प्रकल्पचालकांचे म्हणणे आहे.  पावडर कोण आणि कुठे तयार करणार  ‘‘दहा लाख लीटर दुधाची भुकटी करुन ती साठवली जाईल. भुकटीची ऑनलाइन विक्री केली जाईल, असे राज्य शासन सांगत आहे. पण, महानंद किंवा आरेकडे इतक्या दुधाची पावडर करण्याची क्षमताच नाही. सहकारी संस्थांनाही त्यांच्याकडच्या दुधाची पावडर करता करता नाकी दम आलेला आहे. त्यामुळे सरकार या दुधाची पावडर कुठे करणार आहे,’’ असा सवाल पावडर प्रकल्पांकडून उपस्थित केला जात आहे.