परभणी, हिंगोली जिल्ह्यात हरभऱ्याचे साडेपाच कोटींचे चुकारे रखडले

परभणी : किमान आधारभूत किंमत खरेदी योजनेअंतर्गंत सन २०२०-२१ च्या हंगामात राज्य सहकारी पणन महासंघातर्फे परभणी, हिंगोली जिल्ह्यातील १४ केंद्रांवर ९ हजार ८२४ शेतकऱ्यांचा १ लाख ३१ हजार ४८३ क्विंटल हरभरा खरेदी करण्यात आला आहे. मात्र, अद्याप ८९१ शेतकऱ्यांचे ११ हजार २६६ क्विंटल हरभऱ्याचे ५ कोटी ४९ लाख २१ हजार ७५० रुपयाचे चुकारे रखडले आहेत.

परभणी जिल्ह्यातील परभणी, जिंतूर, बोरी, सेलू, पाथरी, सोनपेठ, पूर्णा या सात केंद्रांवर ४ हजार २६८ शेतकऱ्यांचा ५१ हजार १५४ क्विंटल आणि हिंगोली जिल्ह्यातील हिंगोली, कळमनुरी, वसमत, जवळा बाजार, सेनगाव, साखरा ७ केंद्रांवर ५ हजार ५५६ शेतकऱ्यांचा ८० हजार ३२८ क्विंटल हरभरा खरेदी करण्यात आला. आजवर या दोन जिल्ह्यातील ८ हजार ९३३ शेतकऱ्यांना १ लाख २० हजार २१७ क्विंटल हरभऱ्याचे ५८ कोटी ६० लाख ६१ हजार २३८ रुपयाचे चुकारे अदा करण्यात आले.

काही केंद्रांवर हरभरा खरेदी करणाऱ्या संस्थांनी शेतकऱ्यांना कच्च्या पावत्या दिल्या. शेतकऱ्यांनी पक्क्या पावत्यांची मागणी केली. मात्र, त्या देण्यात आलेल्या नाहीत. तसेच अनेक शेतकऱ्यांच्या बॅंक खात्याच्या तपशिलात चुका आहेत. असे सूत्रांनी सांगितले. हरभऱ्याची खरेदी पूर्ण होऊन मोठा कालावधी उलटला. परंतु, अद्याप परभणी, जिंतूर, सेलू, पाथरी, सोनपेठ, हिंगोली, कळमनुरी, वसमत, जवळा बाजार या १२ केंद्रांवरील ८९१ शेतकऱ्यांचे चुकारे अदा न केल्यामुळे अडचणी वाढल्या आहेत.

केंद्रनिहाय चुकारे अदा स्थिती