‘आरटीजीएस'द्वारे ग्रामपंचायत कर्मचाऱ्यांचा पगार

सोलापूर : ग्रामपंचायत कर्मचाऱ्यांचे सहा महिन्यांचे किमान वेतन अनुदान शासनाच्या हिश्‍श्‍यापोटी ५ कोटी ५३ लाख ४० हजार रुपये जिल्हा परिषदेकडे प्राप्त झाले आहेत. हे अनुदान ग्रामपंचायतीकडे वर्ग न करता ग्रामपंचायत कर्मचाऱ्यांच्या खात्यावर पंचायत समितीमार्फत ‘आरटीजीएस''ने वर्ग करण्याचा निर्णय जिल्हा परिषदेने घेतला आहे.

ग्रामपंचायत कर्मचारी युनियनचे जिल्हाध्यक्ष दिलीप जाधव यांनी ग्रामपंचायतीकडे हे अनुदान वर्ग केल्यास कर्मचाऱ्यांना मिळणार नसल्याचे अधिकाऱ्यांच्या निदर्शनास आणून दिले होते. ते अनुदान इतर कामासाठी ग्रामपंचायती वापरू शकतात. काही ग्रामपंचायतीची बॅंक खाती डीसीसी व इतर बॅंकेत आहेत. ग्रामपंचायतीच्या निवडणुका लागलेल्या असल्याने या अनुदानाच्या रकमा कर्मचाऱ्यांना वेळेवर मिळू शकणार नाहीत. त्यामुळे जिल्हा परिषदेचे मुख्य कार्यकारी अधिकारी डॉ. राजेंद्र भारुड व ग्रामपंचायत विभागाच्या उपमुख्य कार्यकारी अधिकारी चंचल पाटील यांनी कर्मचाऱ्यांच्या बॅंक खात्यावर ‘आरटीजीएस''द्वारे अनुदान जमा करण्याचे आदेश दिले आहेत.

जिल्ह्यातील एक हजार २९ ग्रामपंचायतींमधील दोन हजार कर्मचाऱ्यांना याचा लाभ मिळणार आहे. या निर्णयामुळे कर्मचाऱ्यांमध्ये आनंदाचे वातावरण पसरले आहे. या वेळी मोहन लामकाने, मसुदेव रणदिवे, महादेव माळी, लक्ष्मण खरात, भगवान कांबळे, गुरुबा भोसले, अरुण सुर्वे उपस्थित होते.