राज्यातील १२१ ग्रामपंचायतींना स्वतंत्र इमारत बांधण्यास मंजुरी

संग्रहित छायाचित्र
संग्रहित छायाचित्र

मुंबई  : बाळासाहेब ठाकरे स्मृती मातोश्री ग्रामपंचायत बांधणी योजनेंतर्गत राज्यातील आणखी १२१ ग्रामपंचायतींना कार्यालयासाठी स्वतंत्र इमारत बांधण्यास ग्रामविकास विभागाने मंजुरी दिली. याचा शासन निर्णयही जारी झाला आहे. प्रत्येकी १२ लाख रुपयांच्या निधीतून या इमारती उभारण्यात येणार आहेत.

बाळासाहेब ठाकरे स्मृती मातोश्री ग्रामपंचायत बांधणी योजनेच्या सुधारित शासन निर्णयानुसार इमारत नसलेल्या राज्यातील सर्वच ग्रामपंचायतींना स्वतंत्र इमारत मिळणार आहे. या अंतर्गत प्रत्येक ग्रामपंचायत कार्यालयासाठी शासनाकडून १५ लाख रुपये मिळणार असून २०१८-१९ या वर्षासाठी ५५ कोटींची तरतूद करण्यात आली आहे. राज्यातील एक हजारापेक्षा कमी लोकसंख्या असलेल्या ज्या गावांमध्ये ग्रामपंचायतींना कार्यालयासाठी इमारत नाही, अशा ग्रामपंचायतींचा स्वतंत्र इमारत बांधण्यासाठी बाळासाहेब ठाकरे स्मृती मातोश्री ग्रामपंचायत बांधणीयोजनेंतर्गत समावेश करण्यात आला आहे.

या योजनेंतर्गत पहिल्या टप्प्यात ३०२, दुसऱ्या टप्प्यात ५४ तर आता तिसऱ्या टप्प्यात १२१ ग्रामपंचायतींचा समावेश करण्यात आला आहे. योजनेंतर्गत पहिल्या टप्प्यात बीड जिल्ह्यातील ६४, दुसऱ्या टप्प्यात २१ तर आता तिसऱ्या टप्प्यात ९ ग्रामपंचायतीचा समावेश करण्यात आला आहे. आता परळी तालुक्यातील परचुंडी, धारूर तालुक्यातील वरकटवाडी, पांगरी केज तालुक्यात पळसखेडा, काशीदवाडी अंबाजोगाई तालुक्यातील धावडी, माजलगांव तालुक्यात ढोरगांव, ब्रह्मगांव या ग्रामपंचायतींना नवीन इमारतीसाठी मंजुरी देण्यात आली आहे.

ग्रामविकास विभागाने त्यासोबतच राज्यातील जिल्हा परिषद आणि पंचायत समित्यांच्या प्रशस्त आणि आधुनिक अशा ८० इमारतींना मंजुरी देऊन वेळेत निधी वितरीत केला. या इमारतींची बांधकामे सध्या अंतिम टप्प्यात आहेत.  २०१४-१५ या वर्षी ३ इमारतींना ५.४८ कोटी, २०१५-१६ मध्ये २४ इमारतींना ६३.५९ कोटी, २०१६-१७ मध्ये २५ इमारतींना ६५.२० कोटी तर २०१७-१८ मध्ये २८ इमारतींना ४० कोटी अशा एकूण ८० इमारतींना १७५ कोटींचा निधी दिला आहे.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com