स्वच्छ गाव, स्वच्छ तालुका योजनेत पुण्यातील ९९२ ग्रामपंचायतींचा सहभाग

पुणे   : पुणे जिल्हा परिषदेच्या ‘स्वच्छ गाव व स्वच्छ तालुका पारितोषिक’ योजनेत जिल्ह्यातील ९९२ ग्रामपंचायतींनी सहभाग नोंदविला आहे. जिल्हा परिषदेने ऑनलाइन स्वरूपात एखाद्या योजनेत सहभाग नोंदविण्याची प्रक्रिया प्रथमच केली असून, यामध्ये वेल्हा, खेड, पुरंदर व आंबेगावमधून उत्तम प्रतिसाद लाभला असल्याची माहिती जिल्हा परिषदेचे अध्यक्ष विश्‍वास देवकाते यांनी दिली.

अध्यक्ष देवकाते म्हणाले, की राष्ट्रीय स्तरावर सुरू असलेल्या स्वच्छ भारत मिशन तसेच राज्य शासनाच्या संत गाडगेबाबा ग्राम स्वच्छता अभियानांतर्गत पुणे जिल्ह्यात गाव स्तरावर स्वच्छतेविषयक कामे सुरू आहेत. सुरू असलेल्या कामांना अधिक गती मिळण्यासाठी, जिल्ह्यातील स्वच्छतेचा दर्जा वाढण्यासाठी या स्पर्धेचे आयोजन करण्यात आले आहे.

यात प्रत्येक तालुक्यातून ३ ग्रामपंचायती व जिल्ह्यातील तीन पंचायत समितींची निवड करण्यात येणार आहे. विजेत्या ग्रामपंचायतींचे सरपंच व ग्रामसेवक, पंचायत समित्यांचे सभापती, गटविकास अधिकारी यांना जिल्हा स्तरावर प्रशस्तिपत्रक व सन्मानचिन्ह देऊन सन्मानित करण्यात येणार आहे.

१० सप्टेंबर ते ३१ ऑक्टोबर या कालावधीत अंमलबजावणी व केलेल्या कामांचे मूल्यांकन करण्यात येणार आहे. योजनेत वैयक्तिक शौचालयाबाबत केलेले काम, घनकचरा व्यवस्थापन, सांडपाणी व्यवस्थापन, एका शोषखड्डा शौचालयाचे दोन शोषखड्ड्यांच्या शौचालयात रूपांतर, वैयक्तिक शोषखड्ड्यांचे बांधकाम, सार्वजनिक स्वच्छता, नादुरुस्त शौचालयांची दुरुस्ती, प्रचार प्रसिद्धी, गावातील लोकसहभाग यासाठी गुणांची विभागणी करून सर्वाधिक गुण मिळविणाऱ्या ग्रामपंचायती व तालुक्यांची निवड करण्यात येणार आहे.