द्राक्ष व्यापाऱ्याकडून ७ कोटींना गंडा

अंबासन, जि. नाशिक ः सटाणा व मालेगाव परिसरातील शेकडो द्राक्ष उत्पादक शेतकऱ्यांची दिल्लीच्या आझादपूर येथील रोहितकुमार ॲन्ड जतिनकुमार या व्यापाऱ्याने सात कोटींवर रकमेची फसवणूक करून गंडा घातला आहे. त्यामुळे आधीच आर्थिक संकटात असलेल्या शेतकऱ्यांची ‘दुष्काळात तेरावा महिना’, अशी गत झाली आहे.  नोव्हेंबर २०१७ ते जानेवारी २०१८ पर्यंत सटाणा व मालेगाव परिसरातील शेकडो द्राक्ष उत्पादक शेतकऱ्यांनी दिल्लीतील आझादपूर फळबाजार समितीतील आर. जे. सी. या व्यापाऱ्याला द्राक्ष एका ट्रान्स्पोर्टमार्फत पोच केले. सुरवातीला या व्यापाऱ्याने वेळेत पैसे अदा करून शेतकऱ्यांचा विश्‍वास संपादन केला. त्यामुळे पुढील पैसेही मिळतील, या आशेवर शेकडो शेतकऱ्यांनी द्राक्ष विक्री केले. मात्र आजतागायत या व्यापाऱ्याने एकाही शेतकऱ्याचे पैसे न दिल्याने फसवणूक झाल्याचे लक्षात आल्याने द्राक्ष उत्पादक हवालदिल झाले आहेत.  गुरुवारी (ता. २१) निवडक द्राक्ष उत्पादकांनी दिल्ली गाठत तेथील फळबाजार समितीचे सचिव गोयल यांची भेट घेतली असता, संबंधित व्यापाऱ्यावर परवाना रद्द व आडत सील करू शकतो, यावर काहीही करू शकत नसल्याने न्यायालयात जाण्याचा सल्ला दिला. शेतकऱ्यांनी दिल्लीत केंद्रीय संरक्षण राज्यमंत्री डॉ. सुभाष भामरे यांची भेट घेत पैसे मिळवून देण्यासाठी निवेदन दिले. रविवारी (ता. २४) शेकडो द्राक्ष उत्पादक शेतकऱ्यांनी नळकस (ता. बागलाण) येथे जमा होत तीन ते चार तास चर्चा केली. चर्चेअखेरीस व्यापाऱ्याकडून कोणत्याही प्रकारे प्रतिसाद न मिळाल्याने त्यावर फसवणुकीचा गुन्हा दाखल करण्याचे निश्‍चित केले. शिवारखरेदी योजनेतून शेतकऱ्यांमध्ये पुन्हा जनजागृती करण्याची गरज निर्माण झाली आहे.