जत तालुक्यात पावसाअभावी द्राक्ष, डाळिंब पीक धोक्यात

सांगली  ः जत तालुक्‍यात यंदा सरासरीइतकाही पाऊस झालेला नाही. तालुक्‍यात केवळ २०० मिलिमीटर पावसाची नोंद झाली आहे. परिणामी तालुक्‍यातून टॅंकरची मागणी वाढू लागली आहे. तालुक्‍यातील १३ तलाव, २ मध्यम प्रकल्प आणि जलंसधारण विभागाचे ९ तलाव कोरडे पडले आहेत. त्यामुळे द्राक्ष, डाळिंब पिके धोक्‍यात आली आहेत.

जत तालुक्‍यावर वारंवार पावसाची अवकृपा होऊ लागली आहे. त्यामुळे शेतकरी संकटात सापडले आहेत. गेल्या दोन ते तीन वर्षांपासून या भागातील शेतकरी दुष्काळाशी दोन हात करून लढत आहेत. यंदा तालुक्‍यात परतीचा पाऊस झालेला नाही. यामुळे शेतकरी निराश आहेत. तालुक्‍यातील पाणीटंचाई दूर व्हावी, यासाठी जलयुक्त शिवार योजनेतून अनेक कामे झाली. मात्र, पाऊस नसल्याने या कामांमध्ये पाणीसाठा झालेला नाही. तालुक्‍यातील तलाव, कोल्हापूर पद्धतीचे बंधारे कोरडे पडले आहेत.

सद्यःस्थितीत जत तालुक्‍यातील १६ गावांनी टॅंकरची मागणी केली आहेत. पण प्रशासन टॅंकर देण्यासाठी चालढकल करत आहेत. परंतु वास्तवात आजच्या स्थितीला ३० गावांना टॅंकरची गरज असल्याचे चित्र आहे. पुढील १५ दिवसांत टॅंकरची मागणी वाढण्याची शक्‍यता आहेत. त्यामुळे प्रशासनाने उपाययोजना करावेत, अशी मागणी होऊ लागली आहे.

पाणी मिळेना जत तालुक्‍यात सरासरीपेक्षा कमी पाऊस झाल्यामुळे भूजलपातळी वाढलेली नाही. म्हैसाळ उपसा सिंचन योजना नुकतीच सुरू झालेली आहे. त्यामुळे जत तालुक्‍यात कधी या योजनेचे पाणी येणार, असा प्रश्‍न शेतकरी उपस्थित करू लागले आहेत. तालुक्‍याच्या पूर्व भागातील ४१ गावांत या योजनेचे पाणी मिळत नाहीत. यामुळे या भागातील द्राक्ष आणि डाळिंब उत्पादक शेतकरी हतबल झाले आहेत. तलाव कोरडे पडले आहेत. त्यामुळे द्राक्ष, डाळिंब पिकांना टॅंकरद्वारे पाणी द्यायचे म्हणले, तरी पाणी मिळत नसल्याचे चित्र आहे.