द्राक्ष-डाळिंब प्रदर्शनास सोलापुरात आज प्रारंभ

सोलापूर : "सकाळ-ॲग्रोवन''च्या वतीने भरविण्यात येत असलेल्या द्राक्ष-डाळिंब प्रदर्शनाचे गुरुवारी (ता. ४) सोलापुरात उद्‌घाटन होत आहे.  तीन दिवस चालणाऱ्या या प्रदर्शनात द्राक्ष-डाळिंब शेतीसंबंधीत नवीन माहिती, ज्ञानाबरोबर आधुनिक कृषी तंत्रज्ञानाचा आविष्कार शेतकऱ्यांना अनुभवता येणार आहेच, पण द्राक्ष-डाळिंबातील विविध विषयांवरील चर्चासत्रांची भरगच्च मेजवानी यानिमित्ताने आयोजिण्यात आली आहे.  सिव्हिल चौकातील पोलिस हेडक्वॉर्टरसमोरील ॲचिव्हर्स मल्टिपर्पज हॉलमध्ये गुरुवारी जिल्हा परिषदेचे अध्यक्ष संजय शिंदे यांच्या हस्ते प्रदर्शनाचे उद्‍घाटन होईल. ‘चला, मिळून करूया संपन्नतेच्या प्रवासास सुरवात’, हे ब्रीदवाक्‍य घेऊन ‘सकाळ-ॲग्रोवन''ने हा उपक्रम आयोजिला आहे. राज्यातील अनेक नामवंत कंपन्यांची उत्पादने एकाच ठिकाणी, एकाच छताखाली शेतकऱ्यांना पाहायला मिळणार आहेत. गुरुवार (ता. ४), शुक्रवार (ता. ५) आणि शनिवार (ता. ६) असे तीन दिवस सकाळी दहा ते सायंकाळी सात या वेळेत हे प्रदर्शन पाहण्यासाठी खुले राहणार आहे.  या प्रदर्शनाच्या माध्यमातून शेतकरी ते व्यावसायिक असा थेट संवाद साधला जाणार आहे. तसेच शेतकरी ते शास्त्रज्ञ या माध्यमातूनही द्राक्ष-डाळिंबातील विविध प्रश्‍नांवर, व्यवस्थापनावर तज्ज्ञांच्या चर्चासत्रांचे आयोजन या ठिकाणी करण्यात आले आहे. या माध्यमातून नवीन ज्ञान मिळवताना, द्राक्ष आणि डाळिंब शेतीतील नवीन तंत्रज्ञानाचा अाविष्कार अनुभवण्याची संधी या निमित्ताने ‘ॲग्रोवन’ने शेतकऱ्यांना उपलब्ध करून दिली आहे.  काय आहे प्रदर्शनात द्राक्ष-डाळिंब शेतीतील विविध तंत्रज्ञान, आवश्‍यक विविध अवजारे, उपकरणे, मुख्यतः इन्फास्ट्रक्‍चर (वायर आणि अँगल), टिश्‍युकल्चर, ड्रीप-मायक्रोइरिगेशन, इक्विपमेंट, ब्लोअर, पॉवर टिलर, ट्रॅक्‍टर, शेततळे, शेडनेट व हेल ग्रीन नेट, फर्टिलायझर्स, पेस्टिसाईड्‌स, बायोफर्टिलायझर, एक्‍सपोर्ट कंपनी, पॅकिंग आणि कोल्ड स्टोरेज, बॅंक, द्राक्ष प्रक्रिया (बेदाणा), डाळिंब प्रक्रिया (ज्यूस, अनारदाना) आदी क्षेत्रातील नामवंत कंपन्यांची उत्पादने या ठिकाणी विक्रीसाठी उपलब्ध असतील. चर्चासत्रांची मेजवानी प्रदर्शनाच्या निमित्ताने शेतकऱ्यांना नवीन ज्ञान, तंत्रज्ञानाची माहिती व्हावी, या अनुषंगाने नामवंत तज्ज्ञांच्या चर्चासत्रांची मेजवानीही आयोजिण्यात आली आहे. त्यात शुक्रवारी (ता. ५) दुपारी १२ वाजता संगमनेरचे डाळिंब अभ्यासक, विषयतज्ज्ञ बाबासाहेब गोरे हे ‘शाश्‍वत डाळिंब शेती तंत्रज्ञान’ या विषयावर मार्गदर्शन करतील. तर दुपारच्या सत्रात तीन वाजता ‘ऑक्‍टोबर छाटणीनंतरचे द्राक्ष व्यवस्थापन’ या विषयावर प्रयोगशील शेतकरी मारुती चव्हाण (पलूस) हे आपले अनुभव सांगतील. शनिवारी (ता.६) दुपारी बारा वाजता राष्ट्रीय द्राक्ष संशोधन केंद्राचे डॉ. एस.डी.रामटेके ‘द्राक्षातील सुधारित तंत्रज्ञान व संजीवकांचा वापर’ या विषयावर मार्गदर्शन करतील. तर दुपारच्या सत्रात तीन वाजता ‘निर्यातक्षम डाळिंब उत्पादन व गटशेती’ या विषयावर प्रयोगशील शेतकरी अंकुश पडवळे बोलतील.