निर्यातीमुळे सुधारेल ग्रामीण अर्थकारण : डॉ. पंचभाई

नागपूर : भाजीपाला उत्पादक भूगावमधून निर्यातीला भरपूर वाव आहे. त्यादृष्टीने शेतकऱ्यांनी सामूहिक प्रयत्न केल्यास निश्‍चितच गावात मोठे आर्थिक परिवर्तन शक्‍य होईल, असा विश्‍वास नागपूर कृषी महाविद्यालयाचे सहयाेगी अधिष्ठाता डॉ. डी. एम. पंचभाई यांनी व्यक्‍त केला. 

भारत सरकारच्या हिल (इंडिया) कंपनीद्वारे ''कीटकनाशकांचा सुरक्षित वापर'' या विषयावर आयोजित एकदिवसीय कार्यशाळेत ते बोलत होते. हिल (एच.आय.एल.) इंडियाचे व्यवस्थापक (बियाणे) अनिल यादव, कृषी विकास अधिकारी पी. डी. देशमुख, कृषिक्रांती कृषी सेवा केंद्राचे संचालक ओम जाजोदिया उपस्थित होते. 

डॉ. पंचभाई म्हणाले, `'भाजीपाल्यावर रासायनिक फवारणी मोठ्या प्रमाणावर केली जाते. ती टप्याटप्याने कमी करण्याची गरज आहे. पिकांमध्ये रसायनाचा अंश कमी असल्यास त्याला आंतरराष्ट्रीय स्तरावर मागणी राहते. त्यादृष्टीने शेतकऱ्यांनी प्रयत्न करावे. व्यापक जागृती झाल्यास आणि सुरक्षा साधनांचा स्वयंस्फूर्तीने वापर वाढल्यास फवारणी दरम्यान होणाऱ्या विषबाधेच्या प्रकारावर नियंत्रण मिळविता येईल.'`

अनिल यादव यांनी कीटकनाशकाची खरेदी, हाताळणी, साठवणूक, फवारणी अशा विविध टप्प्यांवर घ्यावयाच्या काळजीविषयी सांगितले. देशमुख यांनी शासकीय योजनांची माहिती दिली. जाजोदीया यांनी कापूस उत्पादकता वाढीसाठीचे पूरक तंत्रज्ञान याविषयी माहिती दिली. सूत्रसंचालन गणेश वरठी यांनी केले. या वेळी शेतकऱ्यांना भेंडी बियाणे व सेफ्टी किटचे वाटप करण्यात आले.