द्राक्ष उत्पादकांना तज्ज्ञांचे बांधावर मार्गदर्शन

नाशिक : द्राक्ष बागायतदारांना येणाऱ्या अडचणी व त्यांच्या शंकांचे निरसन करण्यासाठी द्राक्ष विज्ञान मंडळातर्फे थेट द्राक्ष उत्पादकांच्या प्लॉटवर चर्चा, मार्गदर्शनपर अभ्यास दौऱ्याचे आयोजन करण्यात आले.  

द्राक्ष विज्ञान मंडळाच्या द्राक्ष विज्ञान अभियानाअंतर्गत अभ्यास दौऱ्याचा उपक्रम राबविण्यात आला. जिल्ह्यातील मामा जम्बो व सुधाकर या द्राक्ष वाणांची झालेली लागवड व त्यासाठी आवश्यक असलेले नियोजन या संदर्भात शेतकऱ्यांना मार्गदर्शन करण्यात आले. मामा जम्बो वाणाचे जनक दीपक वायकर, सुधाकर द्राक्ष वाणाचे जनक सुधाकर क्षीरसागर यांनी मार्गदर्शन केले. 

या अभ्यास दौऱ्यात जिल्ह्यातील विविध ठिकाणी थेट प्लॉटवर भेटी देण्यात आल्या. माडसांगवी येथील प्रगतशील शेतकरी प्रदीप पेखळे यांच्या प्लॉटला भेट देऊन सरपंच मीराबाई पेखळे यांच्या हस्ते दौऱ्याचा प्रारंभ करण्यात आला. यानंतर ओझर येथील द्राक्ष बागायतदार निंबाळकर, शिरसगाव येथील तुषार मोरे, तळेगाव येथील अशोक पाटील यांच्या प्लॉटला भेटी दिल्या. या दोन्ही द्राक्ष वाणांसंदर्भातील अडचणी जाणून घेऊन तज्ज्ञ मार्गदर्शकांनी बागेसंदर्भातील व्यवस्थापन, उत्पादन याबाबत मार्गदर्शन केले. 

राहुल जाधव, विशाल मिरजे यांनी द्राक्ष उत्पादकांना खत, पाणी व्यवस्थापनाबद्दल प्रात्यक्षिक करून दाखवले. राहाता, संगमनेर, नारायणगाव या ठिकाणांहून अनेक द्राक्ष उत्पादक सहभागी झाले. मंडळाचे संचालक विजय पिंगळे, रामदास मोरे, शांताराम कमानकर, वसंत शेजवळ, रवी थेटे यांनी परिश्रम घेतले. अभियानाचे समन्वयक म्हणून मंडळाचे अध्यक्ष वसंत ढिकले यांनी काम पाहिले.