विदर्भात गारपिटीची शक्यता

पुणे ः पावसाला पोषक वातावरण तयार झाल्याने विदर्भात शुक्रवारी (ता.१३) व शनिवारी (ता.१४) तुरळक ठिकाणी वादळी पावसाची शक्यता आहे. तर मध्य प्रदेश व छत्तीसगड राज्यामध्ये मेघगर्जनेसह, पाऊस आणि गारपिटीचा इशारा हवामान विभागाने दिला आहे. त्यामुळे विदर्भातही तुरळक ठिकाणी गारपिटीची शक्यता आहे. अरबी समुद्रातील कमी दाबाच्या क्षेत्राची तिव्रता कमी आहे. मात्र, त्याचा काही प्रमाणात परिणाम गेल्या दोन दिवसांपासून राज्याच्या वातावरणावर होत आहे. त्यामुळे राज्यातील थंडी कमी झाली असली तरी पुन्हा राज्यात थंडी हातपाय पसरविण्यास सुरुवात करण्याची शक्यता आहे. बुधवारी (ता.११) सकाळी आठ वाजेपर्यंतच्या चोवीस नागपूर येथे १३.१ अंश सेल्सिअसची सर्वांत कमी किमान तापमानाची नोंद झाली आहे. त्यापाठोपाठ गोदिया, चंद्रपूर या भागातही किचिंत थंडी असून किमान तापमान १३ अंश सेल्सिअसच्या दरम्यान होते.  कोकण, मध्य महाराष्ट्र व मराठवाडा या भागात हवामान कोरडे होते. त्यामुळे या भागात किंचित थंडी असून काही ठिकाणी थंडी कमी झाली होती. त्यामुळे तापमानात चढउतार असल्याची स्थिती होती. खान्देशात १३ ते १६ अंश सेल्सिअसच्या दरम्यान तापमान होते. मध्य महाराष्ट्रात १४ ते १८, कोकणात २१ ते २३ तर मराठवाड्यात १४ ते १७ अंश सेल्सिअस एवढे तापमान होते. मात्र, पुढील काही दिवस थंडीत वाढ होण्याची शक्यता असून किमान तापमानाचा पारा घसरण्याचा अंदाज वर्तविण्यात आला आहे. बुधवारी (ता.११) सकाळी आठ वाजेपर्यंतच्या चोवीस तासांतील विविध ठिकाणचे किमान तापमान, अंश सेल्सिअसमध्ये, कंसात वाढ, घट ः नगर १७.५ (६), अकोला १४.९ (१), अलिबाग २२.४ (३), अमरावती १५.०, औरंगाबाद १४.३ (३), बीड १७.६ (६), बुलढाणा १६.६ (२), चंद्रपूर १३.०, डहाणू २२.१ (३), गोंदिया १३.८ (१), जळगाव १५.६ (१), धुळे १६.०, कोल्हापूर १८.६ (३), महाबळेश्वर १४.६ (१), मालेगाव १७.० (६), मुंबई २१.८ (३), नागपूर १३.१, नांदेड १६.० (३), नाशिक १५.४ (५), निफाड १३.२, परभणी १४.६ (१), लोहगाव १८.० (६), पाषाण १७.६ (६), पुणे १६.० (५), रत्नागिरी २१.७ (२), सांगली १८.० (३), सातारा १६.० (३), सोलापूर १८.५ (३), ठाणे २३.०, वर्धा १३.८ (-१), यवतमाळ १४.० (-१)