मध्य महाराष्ट्रात गारपिटीचा इशारा

राज्यात पूर्वमोसमी पावसाला पोषक हवामान झाल्याने मराठवाड्यातील नांदेड, जालना, तर विदर्भातील अमरावती जिल्ह्यात वादळी पावसाने हजेरी लावली आहे.
Hawaman
Hawaman

पुणे : राज्यात पूर्वमोसमी पावसाला पोषक हवामान झाल्याने मराठवाड्यातील नांदेड, जालना, तर विदर्भातील अमरावती जिल्ह्यात वादळी पावसाने हजेरी लावली आहे. आज (ता.२९) कोकण,विदर्भ, मध्य महाराष्ट्र, मराठवाड्यात जोरदार वारे मेघगर्जना, विजांसह पावसाचा अंदाज आहे. मध्य महाराष्ट्रात गारपीट होण्याचा इशाराही हवामान विभागाने दिला आहे. तापमानातही चढ-उतार होण्याची शक्यता वर्तविण्यात आली आहे. राज्यात पूर्वमोसमी पावसाचे ढग जमा होण्यास सुरवात झाली आहे. मंगळवारी (ता. २८) दुपारनंतर जालना जिल्ह्यातील नळविहिरा (ता. जाफराबाद) येथे पावसाला सुरवात झाली होती. तर नांदेड जिल्ह्यातील अर्धापूर तालुक्यात गारपिटीसह आलेल्या पावसाने शिजविलेल्या हळदीचे नुकसान झाले. विदर्भातील अमरावती जिल्ह्याच्या मोर्शीतही वादळी वाऱ्यासह पावसाची हजेरी लावली. मराठवाडा, विदर्भात अनेक ठिकाणी पावसाचे ढग जमा झाले होते. तर मध्य महाराष्ट्र, आणि कोकणात आकाश अंशत: ढगाळ होते. राज्याच्या तापमानातही चढ-उतार सुरूच असून, मंगळवारी (ता.२८) सकाळपर्यंतच्या २४ तासांमध्ये विदर्भातील अकोला येथे उच्चांकी ४२.६ अंश सेल्सिअस तापमानाची नोंद झाली. जळगाव, धुळे, सोलापूर, परभणी, अकोला, ब्रह्मपुरी, चंद्रपूर, वाशीम येथे तापमान ४० अंशांच्या पुढे असून, उर्वरित राज्यात पारा चाळीशी खाली घसरला आहे. तापमानात काहीशी घट झाली असली तरी, उन्हाचा चटका कायम राहणार आहे. मध्य महाराष्ट्रातील सातारा, सांगली, सोलापूर, कोल्हापूर, जिल्ह्यात गारपीट होण्याचा इशारा आहे. तर पुणे, नगर, कोकणातील रायगड, रत्नागिरी, सिंधुदुर्ग, मराठवाड्यातील उस्मानाबाद, बीड, लातूर, परभणी, नांदेड, हिंगोली, विदर्भातील बुलडाणा, वाशिम, यवतमाळ, चंद्रूपर जिल्ह्यात वादळी पावसाचा अंदाज वर्तविण्यात आला आहे. मंगळवारी (ता. २८) सकाळपर्यंतच्या २४ तासांमध्ये राज्यातील विविध ठिकाणचे कमाल तापमान (अंश सेल्सिअसमध्ये) : पुणे ३८.०, जळगाव ४१.४, धुळे ४०.०, कोल्हापूर ३६.१, महाबळेश्‍वर ३१.६, मालेगाव ३८.२, नाशिक ३६.४, निफाड ३६.८, सांगली ३८.२, सोलापूर ४१.१, डहाणू ३३.७, सांताक्रूझ ३३.६, रत्नागिरी ३५.२, औरंगाबाद ३८.४, परभणी ४१.२, अकोला ४२.६, अमरावती ३९.८, बुलडाणा ३८.३, ब्रह्मपुरी ४०.५, चंद्रपूर ४२.०, गोंदिया ३५.६, नागपूर ३९.२, वाशीम ४१.०, वर्धा ३९.४. कमी दाबाचे क्षेत्र तयार होतेय बंगालच्या उपसागराच्या दक्षिण भागात कमी दाब क्षेत्रासाठी पोषक स्थिती होत असून, उद्यापर्यंत (ता.३०) दक्षिण अंदमान समुद्रात ही प्रणाली तयार होण्याचे संकेत आहेत. त्याच्या प्रभावामुळे अंदमान निकोबार बेटसमुह, म्यानमारमध्ये जोरदार पावसाचा इशारा देण्यात आला आहे. बंगालच्या उपसागरात ३ मेपर्यंत ताशी ५० ते ७० किलोमीटर वेगाने वारे, उंच लाट उसळून, समुद्र खवळणार आहे. या काळात मासेमारीसाठी खोल समुद्रात न जाण्याच्या सुचना देण्यात आल्या आहे.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com