फूल उत्पादकांना आस दसरा, दिवाळीची

पुणे : टाळेबंदीत सर्वाधिक फटका बसलेल्या फूल उत्पादक शेतकऱ्यांना गणेशोत्सवानंतर आता दसरा, दिवाळीची आस लागली आहे. या हंगामातील निसर्ग चक्रीवादळ, मॉन्सून हंगामातील सततचा वादळी पाऊस, अतिवृष्टीमुळे फुलांचे मोठे नुकसान झाले आहे. या नुकसानीने कंबरडे मोडल्यानंतर शेतकरी आता नवरात्र, दसरा, दिवाळी या प्रमुख हंगामाच्या आशेवर आहेत. या हंगामात चांगले दर मिळण्याचे संकेत आहेत.

पुणे बाजार समितीमधील फुलांचे प्रमुख आडतदार सागर भोसले म्हणाले,‘‘ यंदाचा फुलांचा हंगाम फारच वाईट सुरु आहे. काही प्रमुख सण सोडले, तर फुलांची मागणी कमीच आहे. कोरोना टाळेबंदीमध्ये सुमारे तीन महिने फुल बाजारासह निर्यात देखील बंद होती. फुले हे जिवनावश्‍क आणि फळे भाजीपाल्यासारखा आहारातील वस्तू  नसल्याने फुल उत्पादक शेतकऱ्यांना सर्वाधिक फटका बसला आहे. फुलांचे शंभर टक्के नुकसान झाले.

कोरोना टाळेबंदी काही प्रमाणात शिथील झाल्यावर गणेशोत्सवात शेतकऱ्यांना दिलासा मिळाला. फुलांची मागणी अंशतः वाढली होती. मात्र गणेशोत्सव देखील साधेपणाने साजरा झाला. त्यामुळे विशेष फायदा शेतकऱ्यांना झाला नाही. तर, आता नवरात्र, दसरा दिवाळीला मागणी वाढणार आहे.’’

‘‘गणेशोत्सवानंतर हे तीनच सण फुल उत्पादकांना चांगले पैसे देणारे ठरतात. यंदा आता कोरोना संकटातून शेतकरी सावरत आहेत. काही शेतकऱ्यांनी आता दसर दिवाळीसाठीचे नियोजन करुन, लागवडी केल्या आहेत. मात्र, आता लांबलेला मॉन्सून, परतीच्या मॉन्सूनचा देखील लांबलेला प्रवास, याचा परिणाम काय होतो, यावर दसरा, दिवाळीतील फुलांची आवक आणि मागणी अवलंबून राहिल. दर आतापेक्षा नक्की वाढतील, अशी शक्यता आहे.’’