डिसेंबरमधील पालवीवरच आंबा हंगाम अवलंबून

रत्नागिरी  : नोव्हेंबर महिन्यात थंडीऐवजी कडाक्याचे ऊन आणि ढगाळ वातावरण, अशी स्थिती होती. त्याचा परिणाम आंबा पालवीच्या प्रक्रियेवर झाला असून पहिल्या टप्प्यात मुबलक मिळणाऱ्या आंबा उत्पादनाला मुकावे लागण्याची भीती बागायतदारांमधून व्यक्त केली जात आहे. मात्र तज्ज्ञ संशोधकांनी डिसेंबर महिन्यातील अखेरपर्यंत पालवीची स्थिती काय राहील, यावरच हंगामातील चित्र अवलंबून असल्याचे स्पष्ट केले आहे. सप्टेंबर महिन्यात परतणारा मोसमी पाऊस यंदा ऑक्टोबरअखेरपर्यंत पडतच होता. त्यामुळे ऑक्टोबर हीट जाणवलीच नाही. पाठोपाठ नोव्हेंबर महिन्यात अपेक्षित थंडीच पडली नाही. डिसेंबर सुरु होत आला तरीही अजून थंडीचा पत्ता नाही. झाडांना आलेली पालवी अजूनही जून झालेली नाही. प्रक्रिया लांबणार असल्याने लवकर तयार होणारा आंबा, यंदा उशिरा तयार होईल. पालवी फुटलेली झाडे जून होणार,  त्यानंतर मोहोर येणार तोपर्यंत उशिरा झालेला असेल. हे सर्व गणित पुढील तीन महिन्यातील हवामानावर अवलंबून राहणार आहे. मोहोर आल्यानंतर फळ परिपक्व होण्यासाठी दोन ते अडीच महिने लागतात. त्यासाठी एप्रिलचा अर्धा महिना उजाडेल अशी सध्याची परिस्थिती आहे. गतवर्षीप्रमाणेच यंदा वातावरणातील बदलांचा परिणाम आंबा हंगामावर झालेला आहे. विदर्भ, मराठवाड्यात ज्या पद्धतीने परतीच्या पावसाचा शेतीवर परिणाम झाला आहे. त्याच पद्धतीने कोकणातील हापूसला फटका बसू शकतो. याबाबत रत्नागिरीतील आंबा बागायतदार तुकाराम घवाळी म्हणाले, यंदा उशिरापर्यंत राहिलेल्या पावसाचे परिणाम संवेदनशील हापूसवर होत आहेत. प्रत्यक्षात उत्पादन केव्हा हाती येईल हे सांगणे अशक्य आहे. सध्या ढगाळ वातावरणामुळे पालवीवरच तुडतुड्याचा प्रादुर्भाव झालेला आहे. त्यावर नियंत्रण मिळवण्यासाठी आवश्यक कीडनाशकाची फवारणी केली आहे. पूर्वी मोहोरलेल्या झाडांवर खार पडत होती, आता पालवीवरच खार पडली आहे. प्रतिक्रिया... पुढील आठवडाभर आठवडाभर वातावरण कसे राहील याचा अभ्यास करुनच पुढील निरीक्षणे नोंदवता येतील. डिसेंबर महिन्याअखेरीस हंगामाचे चित्र सांगता येतील. या कालावधीत मोहोर किती बाहेर आला, फ्लॉवरींग किती झाले  यावर हंगाम कसा राहीले हे सांगू शकतो.  - डॉ. पराग हळदणकर, संशोधक,  कोकण कृषी विद्यापीठ, दापोली.