कृषी शिक्षण आणि संशोधन परिषदेच्या उपाध्यक्षपदी हरिभाऊ जावळे

जळगाव   : रावेर (जि. जळगाव) विधानसभा क्षेत्राचे आमदार हरिभाऊ जावळे यांची महाराष्ट्र कृषी शिक्षण व संशोधन परिषदेच्या उपाध्यक्षपदी नियुक्ती करण्यात आली आहे. या नियुक्तीमुळे जावळे यांना आता कॅबिनेट मंत्रिपदाचा दर्जा असणार आहे. ही नियुक्ती तीन वर्षांसाठी किंवा राज्य शासनाची मर्जी असेल तोपर्यंत असणार आहे, अशी माहिती मिळाली. 

महाराष्ट्र शासनाच्या कृषी, पशुसंवर्धन, दुग्ध व्यवसाय विकास व मत्स्यव्यवसाय विभागाने याबाबत पत्र जारी केले आहे. श्री. जावळे यांची उपाध्यक्षपदावर नियुक्ती करण्यात आल्याचे उपसचिव सु. सं. धपाटे यांनी त्यात म्हटले आहे. कृषिमंत्री डॉ. अनिल बोंडे हे या परिषदेचे पदसिद्ध अध्यक्ष आहेत. महाराष्ट्रात एकूण चार कृषी विद्यापीठे असून, या चारही संस्थांमध्ये प्रभावी समन्वय व सुसूत्रता साधण्यासाठी महाराष्ट्र कृषी शिक्षण व संशोधन परिषदेची स्थापना करण्यात आली.

कृषी विद्यापीठांच्या कार्याचा आढावा घेणे, मूल्यमापन करणे, पर्यवेक्षण करणे आणि मार्गदर्शन करण्याची जबाबदारी कृषी परिषदेवर सोपविण्यात आली आहे. शेतीचा विकास आणि शेतकऱ्यांची सर्वांगीण प्रगती होण्यासाठी ही संस्था गेल्या २५ वर्षांपासून कार्यरत आहे. परिषदेच्या या कार्यवाहीत आमदार जावळे यांची मोठी भूमिका या नियुक्तीमुळे राहणार आहे.