भातपीक कापणीला  सिंधुदुर्गमध्ये सुरुवात 

सिंधुदुर्गनगरी : सतत पडणाऱ्या पावसामुळे रखडलेल्या भातपीक कापणीला जिल्ह्यात सुरुवात झाली असून, शेतशिवारे शेतकऱ्यानी गजबजल्याची चित्र दिसत आहेत.  जिल्ह्यात सप्टेंबर अखेरीपासून भातपीक परिपक्व होण्यास सुरुवात झाली. त्यानंतर गेल्या पंधरा दिवसांत तर जिल्ह्यातील सुमारे ७५ टक्के भातपीक परिपक्व झाले आहे. परंतु सतत पडणाऱ्या पावसामुळे शेतकऱ्यांना भात कापणी करता आलेली नाही. अनेक शेतकऱ्यांचे भातपीक पावसामुळे जमिनीवर आडवे झाले आहे. जिल्ह्यातील शेतकरी पाऊस थांबण्याच्या प्रतीक्षेत होता. जिल्ह्यात शुक्रवारी (ता. १५) काही भागात विजांच्या कडकडाटांसह पाऊस झाला. परंतु सकाळपासून पावसाने चांगली उघडीप दिली होती. त्यामुळे पाऊस पडला तरी तो सायंकाळी उशिरा पडेल, अशी शक्यता गृहीत धरून आता जिल्ह्यातील बहुतांशी शेतकऱ्यांनी भात कापणीला सुरुवात केली आहे.  विजयादशमी असल्यामुळे अनेक शेतकऱ्यांनी भात कापणी केली नाही, परंतु शनिवारी सकाळपासून भात कापणीला चांगलीच गती आली आहे. संपूर्ण शेतीशिवारे शेतकऱ्यांनी गजबजली असल्याचे चित्र गावोगावी पाहायला मिळत आहे. पावसाने उघडीप दिल्यामुळे शेतकरी लवकरात भात कापणी करण्याच्या तयारीत असल्याचे दिसून येत आहे.