जळगाव बाजार समितीत व्यापारी संकुलावरून वादंग कायम

जळगाव  : कृषी उत्पन्न बाजार समितीमध्ये नियोजित नवीन व्यापारी संकुलाच्या बांधकामावरून अडतदार, व्यापाऱ्यांचा विरोध कायम असून, मागील १०-१२ दिवसांपासून धान्य मार्केटयार्डात अघोषित बंदची स्थिती आहे. तर नवीन व्यापारी संकुलामुळे बाजार समितीला एकरकमी सहा कोटी रुपये रक्कम मिळेल व वर्षाकाठी २५ लाख रुपये शुल्क भाड्यापोटी मिळेल. यामुळे बाजार समितीची आर्थिक स्थिती सुधारेल, असा दावा सभापती कैलास चौधरी यांनी केला आहे.  बाजार समितीच्या दर्शनी भागात मुख्य प्रवेशद्वारानजीक १८० गाळ्यांचे दुमजली व्यापारी संकुल उभारण्याचे नियोजन आहे. त्यासंबंधी विकासकाने काही दिवसांपूर्वी कार्यवाही सुरू केली. यातून बाजार समितीची संरक्षण भिंत पाडली व जलकुंभही काढण्यात आला. या संकुलामुळे धान्य मार्केट यार्डातील पहिल्या रांगेतील अडत दुकानांना रस्ता कमी मिळेल व धान्याचे मोजमाप व इतर कार्यवाहीला अडचणी येतील. हे संकुल उभारू नका, असे बाजार समितीमधील अडत असोसिएशनने म्हणणे आहे. 

प्रशासनाचा संकुलासाठी प्रयत्न बाजार समिती प्रशासन व संचालक हे संकुल व्हावे यासाठी कार्यवाही करीत आहे. व्यापारी किंवा अडतदार यांच्या आडमुठेपणामुळे नवीन संकुल उभे राहू शकत नसल्याचे सभापती कैलास चौधरी यांनी म्हटले आहे. शासनाने नियमनमुक्ती आणली आहे. पुढे बाजार समितीचे उत्पन्न कमी होईल. उत्पन्नाचे नवे स्रोत हवे आहेत.  बाजार समितीचे उत्पन्न कमी आहे. वेतन, निवृत्त कर्मचाऱ्यांचे देणे देताना अडचणी येतात. उत्पन्न वाढायला हवे, असेही सभापती चौधरी यांनी सांगितले.

धान्याची आवकच नाही, तर बंद कसला जळगाव बाजार समितीत धान्याचे एरवी रोज लिलाव होत नाहीत. शेतकऱ्याने धान्य आणले की, अडतदार ते पाच-सात दिवस आपल्याकडेच ठेवतात. शेतकऱ्यासमोर मोजमाप, तोलाई केली जात नाही. लिलावांना अडतदार विरोध करतात. यामुळे अनेक शेतकरी आपले धान्य विक्रीसाठी चोपडा, अमळनेर, शिरपूर, नंदुरबार येथे जातात. यातच सध्या धान्य मार्केट यार्डात धान्याची कोणतीही आवक नसल्याने बंदचा कोणताही परिणाम बाजार समितीच्या उत्पन्नासंबंधी होत नसल्याचा दावाही काही संचालकांनी केला आहे.