सूर्य तळपला; चटका तापदायक

पुणे : सूर्य तळपू लागल्याने उन्हाचा चटका अधिकच तापदायक ठरत आहे. विदर्भ, मराठवाडा, मध्य महाराष्ट्रात अनेक ठिकाणी उष्ण लाट आली आहे. आज (ता. २) विदर्भ, मराठवाड्यात उष्ण लाट कायम राहण्याची शक्यता आहे. तर राज्यात वादळी पावसाचा अंदाजही हवामान विभागाने वर्तविला आहे. शनिवारी (ता. १) सकाळपर्यंतच्या २४ तासांमध्ये वर्धा येथे उच्चांकी ४६.७ अंश सेल्सिअस तापमानाची नोंद झाली.  मे महिन्यात वाढलेले तापमान जून महिन्यात काही दिवस कायम राहणार आहे. यातच पूर्वमासेमी पावसाच्या सरीही यंदा कमी बरसल्या आहेत. परिणामी उन्हाचा चटका असह्य होत आहे. कमाल तापमानाचा पारा चाळीशी पार असेल आणि तापमानात सरासरीपेक्षा ४.५ अंशांची वाढ झाली असेल, तसेच कमाल तापमान ४५ अंशांच्या वर गेले असेल तर उष्ण लाट समजली जाते. त्यानुसार शनिवारी सकाळपर्यंतच्या २४ तासांमध्ये विदर्भात बहुतांशी ठिकाणी, तर मराठवाड्यातील परभणी, बीड, औरंगाबाद, मध्य महाराष्ट्रातील सोलापूर, मालेगाव, सातारा आणि पुणे येथे उष्णतेची लाट होती.  यातच पूर्वमोसमी पावसाला पोषक हवामान असल्याने राज्यात दुपारनंतर ढगाळ हवामान होत आहे. ढगाळ हवामानामुळे उकाड्यातही वाढ झाली आहे. शुक्रवारी (ता. ३१) सायंकाळनंतर बुलडाणा जिल्ह्यातील वरवटबकाल, बावणबीर, संग्रामपूर, वानखेड येथे पावसाच्या हलक्या सरी कोसळल्या. आज (ता. २) विदर्भातील भंडारा, चंद्रपूर, गडचिरोली, गोंदिया, नागपूर, यवतमाळ, कोकणातील रत्नागिरी, सिंधदुर्ग, मराठवाड्यातील लातूर जिल्हा आणि परिसरात पावसाची शक्यता हवामान विभागाने वर्तविली आहे.  शनिवारी (ता. ३१) सकाळी साडेआठ वाजेपर्यंतच्या २४ तासांत राज्यातील विविध ठिकाणचे कमाल तापमान, कंसात सरासरीच्या तुलनेत वाढ, घट (अंश सेल्सिअसमध्ये) : पुणे ४०.० (४.७), जळगाव ४४.० (२.४), कोल्हापूर ३७.१(३.६), महाबळेश्वर ३३.५ (६.३), मालेगाव ४४.२ (५.४), नाशिक ३९.१ (२.६), सांगली ३९.१ (२.६), सातारा ४१.२ (७.१), सोलापूर ४४.३(५.७), अलिबाग ३५.३ (२.५), डहाणू ३४.८ (०.८), सांताक्रूझ ३४.५ (१.१), रत्नागिरी ३३.५ (१.१), औरंगाबाद ४२.८ (४.७), बीड ४४.२ (५.४), परभणी ४५.५ (५.०), नांदेड ४४.० (३.४), अकोला ४५.८ (४.७), अमरावती ४५.६ (४.७), बुलडाणा ४२.३ (४.९), बह्मपुरी ४५.१ (३.३), चंद्रपूर ४६.० (३.५), गोंदिया ४३.२ (१.०), नागपूर ४६.५ (४.५), वाशीम ४४.४, वर्धा ४६.७ (५.१), यवतमाळ ४५.०(४.२).  अरबी समुद्रात मॉन्सूनची वाटचाल शक्य नैर्ऋत्य मोसमी वाऱ्यांनी (मॉन्सून) गुरुवारी (ता. ३०) संपूर्ण अंदमान बेटांचा परिसर व्यापला. अरबी समुद्राच्या दक्षिणेकडे असलेल्या मालदीव बेटे आणि लगतच्या कोमोरीन भागातही मॉन्सून दाखल झाला आहे. लक्षद्वीप बेटे आणि परिसरावर हवेच्या खालच्या थरात असलेली चक्राकार वाऱ्यांची स्थिती पश्चिमेकडे सरकणार आहे. तर विषववृत्ताकडून येणाऱ्या वाऱ्यांचे प्रवाह वाढणार असल्याने उद्या (ता. ३) दक्षिण अरबी समुद्रात मॉन्सूनची वाटचाल होण्यास पोषक हवामान आहे. उष्ण लाट असलेली ठिकाणे  विदर्भ : वर्धा ४६.७, चंद्रपूर ४६.०, नागपूर ४६.५, अकोला ४५.८, अमरावती ४५.६, बह्मपुरी ४५.१, यवतमाळ ४५.०, बुलडाणा ४२.३. मराठवाडा : परभणी ४५.५, बीड ४४.२, औरंगाबाद ४२.८, मध्य महाराष्ट्र : सोलापूर ४४.३, मालेगाव ४४.२, सातारा ४१.२, पुणे ४०.०.