विदर्भ, मराठवाड्यात उष्णतेच्या लाटेचा इशारा 

सुर्य आग ओकायला लागल्याने राज्यात कमाल तापमानात मोठी वाढ झाली आहे. उन्हाच्या चटक्याने विदर्भ, मराठवाडा होरपळला आहे, तर उत्तर महाराष्ट्र चांगलाच तापला आहे.
Heatwave
Heatwave

पुणे : सुर्य आग ओकायला लागल्याने राज्यात कमाल तापमानात मोठी वाढ झाली आहे. उन्हाच्या चटक्याने विदर्भ, मराठवाडा होरपळला आहे, तर उत्तर महाराष्ट्र चांगलाच तापला आहे. रविवारी (ता.३) सकाळपर्यंतच्या २४ तासांमध्ये अकोला येथे राज्यातील यंदाच्या हंगामाचे उच्चांकी ४४.८ अंश सेल्सिअस तापमान नोंदले गेले आहे. राज्यात आजपासून (ता.४) उन्हाचा चटका वाढणार असून, विदर्भ, मराठवाड्यात उष्णतेच्या लाटेचा इशारा हवामान विभागाने दिला आहे.  सकाळपासून असलेला उन्हाचा चटका, दुपारनंतर ढगांची निर्मिती होऊन, पडणारा वादळी पाऊस अशीच काहीसे हवामान राज्याच्या विविध भागात अनुभवाला मिळत आहे. मात्र पूर्वमोसमी पावसाने उघडीप देताच राज्यात उन्हाचा चटका अधिकच वाढू लागला आहे. विदर्भात तापमानाचा पारा ४१ ते ४५ अंशादरम्यान आहे. मराठवाड्यात कमाल तापमान ४१ ते ४४ अंश, मध्य महाराष्ट्रात बहुतांशी ठिकाणी ३८ ते ४३ अंश, तर कोकणात ३३ ते ३५ अंशादरम्यान आहे. पुढील गुरूवारपर्यंत (ता.७) राज्यात उन्हाचा चटका वाढणार असून, विदर्भ, मराठवाड्यात उष्णतेच्या लाटेचा इशारा देण्यात आला आहे.  बंगालच्या उपसागरात शुक्रवारी (ता.१) दक्षिण अंदमान समुद्र आणि परिसरावर कमी दाब क्षेत्राची निर्मिती झाली. मात्र या कमी दाब क्षेत्राची तीव्रता वाढण्यास प्रतिकूल स्थिती निर्माण झाली आहे. परिणामी ही प्रणाली अधिक ठळक होण्यासाठी गुरूवार (ता.७) उजाडण्याचे संकेत आहेत. त्यानंतर उत्तरेकडे सरकत जाताना हे कमी दाब क्षेत्र आणखी तीव्र होणार असल्याचे हवामान विभागाने रविवारी स्पष्ट केले.  रविवारी (ता. ३) सकाळपर्यंतच्या २४ तासांमध्ये राजस्थानातील चुरू येथे देशातील उच्चांकी ४५.२ अंश सेल्सिअस तापमानाची नोंद झाली. राज्यातील विविध ठिकाणचे कमाल तापमान (अंश सेल्सिअसमध्ये) : पुणे ३९.९, जळगाव ४३.६, धुळे ४३.०, कोल्हापूर ३७.८, महाबळेश्‍वर ३२.१, मालेगाव ४२.२, नाशिक ३८.९, निफाड ३९.०, सांगली ३८.२, सोलापूर ४२.८, डहाणू ३४.७, सांताक्रूझ ३३.८, रत्नागिरी ३४.२, औरंगाबाद ४१.५, परभणी ४४.२, नांदेड ४४.०, अकोला ४४.८, अमरावती ४४.२, बुलडाणा ४१.०, ब्रह्मपुरी ४३.२, चंद्रपूर ४२.५, गोंदिया ४१.६, नागपूर ४३.२, वर्धा ४४.०.  ऊन तापदायक ठरणारी ठिकाणे  अकोला ४४.८, परभणी ४४.२, अमरावती ४४.२, नांदेड ४४, वर्धा ४४, जळगाव ४३.६, नागपूर ४३.२, ब्रह्मपुरी ४३.२, धुळे ४३. 

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com