पुणे : राज्याच्या किमान तापमानात वाढ झाल्याने चटका आणि उकाड्यामुळे घामाच्या धारा वाहू लागल्या आहेत. मंगळवारी (ता.२) सकाळपर्यंतच्या २४ तासांमध्ये चंद्रपूर येथे राज्यातील उच्चांकी ४३.४ अंश सेल्सिअस तापमानाची नोंद झाली. आज (ता. ३) विदर्भ, मराठवाडा, मध्य महाराष्ट्रात काही ठिकाणी उष्णतेची लाट येण्याचा इशारा देण्यात आला आहे; तर मराठवाडा आणि विदर्भात तुरळक ठिकाणी हलक्या पावसाची शक्यताही हवामान विभागाने वर्तविली आहे. मार्च महिन्याच्या अखेरीस राज्यात अनेक ठिकाणी तापमान ४३ अंशांच्या पुढे गेले होते. दोन दिवसांत राज्याच्या तापमानात किंचित घट होत चंद्रपूर वगळता उर्वरित राज्यात तापमान पुन्हा ४२ अंशांच्या जवळपास आले आहे. विदर्भ, मराठवाड्यात अनेक ठिकाणी सातत्याने ४२ अंशांपेक्षा अधिक तापमानाची नोंद होत आहे. मंगळवारी सकाळपर्यंत कोकणात ३२ ते ३४ अंशांदरम्यान आणि मध्य महाराष्ट्रात अनेक ठिकाणी ४० अंशांच्या आसपास तापमानाची नोंद झाली. बीड येथे तापमान ४२.५ अंशांवर पोचले असून, तापमानात सरासरीपेक्षा ४.५ अंशांची वाढ झाल्याने तेथे उष्णतेची लाट होती. आज (ता. ३) विदर्भ, मध्य महाराष्ट्र, मराठवाड्यामध्ये; तर उद्या विदर्भ आणि मध्य महाराष्ट्रातील काही भागांत उष्णतेची लाट असणार आहे. रविवारपर्यंत राज्यात कमाल तापमान सरासरीपेक्षा २ ते ४ अंशांनी अधिक राहण्याची शक्यता आहे. दक्षिण मध्य महाराष्ट्र, मराठवाडा आणि कर्नाटक परिसरावर १.५ किलोमीटर उंचीवर चक्राकार वारे वाहत असल्याने मराठवाडा आणि विदर्भात आज आणि उद्या ढगाळ हवामानासह हलक्या पावसाला पोषक स्थिती निर्माण झाली आहे.
मंगळवारी (ता. २) सकाळी साडेआठ वाजेपर्यंतच्या २४ तासांत राज्यातील विविध ठिकाणचे कमाल तापमान, कंसात सरासरीच्या तुलनेत वाढ, घट (अंश सेल्सिअसमध्ये) : पुणे ३९.३ (२.२), धुळे ४०.६, जळगाव ४१.८ (१.६), कोल्हापूर ३८.१ (१.१), महाबळेश्वर ३३.८ (२.२), नाशिक ३८.१ (१.०), सांगली ३८.५ (०.४), सातारा ३८.८ (२.६), सोलापूर ४०.६ (१.२), अलिबाग ३२.० (०.१), डहाणू ३२.८ (०.८), सांताक्रूझ ३२.० (-०.९), रत्नागिरी ३२.० (०.१), औरंगाबाद ४०.० (२.४), बीड ४२.५ (४.५), नांदेड ४२.५ (२.८), उस्मानाबाद ४०.४ (२.७), परभणी ४२.६ (३.२), अकोला ४२.१ (२.३), अमरावती ४२.४ (२.६), बुलडाणा ३९.४ (३.२), बह्मपुरी ४१.९ (२.५), चंद्रपूर ४३.४ (२.९), गडचिरोली ४१.६ (-०.४), गोंदिया ४०.८ (१.७), नागपूर ४१.४ (२.२), वाशीम ४२.०, वर्धा ४२.० (२.२), यवतमाळ ४२.० (२.९).
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.