पुणे जिल्ह्यात पूर्वमोसमी पावसाच्या जोरदार सरी

पुणे ः जिल्ह्यात रविवारी (ता. ३१) सायंकाळी जोरदार वारा व ढगाच्या कडकडाटांसह पावसाने जोरदार हजेरी लावली. त्यामुळे हवेत काही प्रमाणात गारवा तयार झाला होता. धरण क्षेत्रातही पावसाच्या सरी कोसळ्याने खरीप हंगामाच्या तयारी सुरू झाली आहे.

सध्या मॉन्सूनची चाहूल लागल्याने शेतकऱ्यांमध्ये उत्साह वाढला आहे. त्यातच हवामान विभागानेही चांगल्या पावसाचा अंदाज दिल्याने शेतकरी खरिपाच्या तयारीला लागला आहे. पुणे जिल्ह्यातील काही भागात रविवारी दुपारनंतर वातावरणात अचानक बदल होऊन पावसाचे वातावरण तयार झाले. सायंकाळी काळेकुट्ट ढग भरून आल्याने पुणे शहरातील वडगाव, कात्रज या भागात पावसाने दमदार हजेरी लावली.

सोमवारी पहाटेही पुणे जिल्ह्यातील जुन्नर, पुरंदर, दौंड, शिरूर, हवेली, खेड, आंबेगाव, मावळ, मुळशी, भोर, वेल्हा या तालुक्यांसह पूर्व पट्यात तुरळक ठिकाणी हलका ते मध्यम स्वरूपाचा पाऊस पडला. यामुळे काढून ठेवलेल्या उन्हाळी बाजरीचे काही प्रमाणात नुकसान झाले. तर जोरदार वाऱ्यामुळे ऊस पिके पडली. काही ठिकाणी भाजीपाला, आंब्याचेही नुकसान झाले.

पश्चिम पट्यातील घोड धरणाच्या पाणलोट क्षेत्राच्या परिसरात ५८ मिलिमीटर पाऊस पडला. तर गुंजवणी ४६ मिलिमीटर, नाझरे ४४ मिलिमीटर, आंध्रा धरणाच्या परिसरात ३७ मिलिमीटर, नीरा देवधर ३६, विसापूर ३०, येडगाव २१, मुळशी २०, वडज १३, डिंभे १०, चिल्हेवाडी पाच, कासारसाई पाच, भाटघर चार, वीर धरणाच्या कार्यक्षेत्रात एक मिलिमीटर पाऊस पडला.

या पावसामुळे शेतकऱ्यांना चांगलाच दिलासा मिळाला. याशिवाय पूर्वेकडे असलेल्या उजनी धरणाच्या परिसरातही पावसाने हजेरी लावल्याने शेतकरी चांगलाच सुखावला आहे. यामुळे जिल्ह्यात झालेल्या पावसामुळे शेतकऱ्यांनी नांगरणी, वखरणी तर भात पट्यातील शेतकरी भाताच्या रोपवाटिकेच्या तयारीला लागला आहे.