मराठवाड्यात पावसाचे धुमशान 

पुणे ः मराठवाड्यात पावसाचे धुमशान सुरूच आहे. औरंगाबादमधील आठ व लातूरमधील तीन मिळून अकरा मंडळात अतिवृष्टी झाली. तर लातूर, उस्मानाबाद, बीड, औरंगाबाद जालना या पाच जिल्ह्यातील १९६ मंडळात पावसाने तुरळक, हलकी, मध्यम ते दमदार हजेरी लावली. यामुळे ओढे, नाले नद्यांच्या पुराचे पाणी शिरल्याने मूग, कांदा, सोयाबीन, कपाशी, तूर पिकाचे नुकसान झाले. शुक्रवारी (ता. १८) सकाळी आठ वाजेपर्यंत परभणी जिल्ह्यातील पूर्णा येथे १४० मिलिमीटर पाऊस पडला. 

कोकणातील बहुतांशी भागात पावसाने चांगलीच हजेरी लावली. रत्नागिरी जिल्ह्यात हलका पाऊस झाला. संगमेश्वर, चिपळूण, लांजा, राजापूर, रत्नागिरी या तालुक्यात हळव्या भाताची कापणी रखडू शकते. रायगड, सिंधुदुर्ग जिल्ह्यांतही हलका ते मध्यम स्वरूपाचा पाऊस झाला. पुणे, नाशिक, सातारा, जळगाव, धुळे जिल्ह्यांत ढगाळ हवामान असून काही ठिकाणी पावसाच्या हलक्या पावसाच्या सरी पडत आहेत. नगर, नंदुरबार, सांगली, कोल्हापूर जिल्ह्यांत बऱ्यापैकी पाऊस पडत आहे. नेवासा येथे सर्वाधिक ९७ मिलिमीटर पाऊस पडला असून शेवगाव, अक्कलकुवा, मंगळवेढा परिसरात जोरदार पाऊस पडला. 

मराठवाड्यात पावसामुळे काढणीला आलेल्या सोयाबीनला कोंब फुटण्याचे प्रकार पुढे येत आहेत. शिवाय काही भागात काढलेल्या व काढणीला आलेल्या उडदाचेही नुकसान झाले. काही ठिकाणी पुरामुळे पीकच वाहून गेल्याच्याही घटना घडल्या आहेत. परभणी जिल्ह्यातील दोन आणि हिंगोली जिल्ह्यातील एका मंडळामध्ये अतिवृष्टी झाली. विदर्भात पावसाचा जोर नसला तरी तुरळक ठिकाणी हलक्या पावसाच्या सरी बरसत आहेत. 

शुक्रवारी (ता.१८) सकाळी आठ वाजेपर्यंत झालेला पाऊस, मिलिमीटरमध्ये ः (स्त्रोत, हवामान विभाग)  कोकण : वाडा ३३, रोहा ३१.३, तळा ५२,गुहागर ३०,खेड ५२, मालवण ५५, वैभववाडी २२, शहापूर ६१.  मध्य महाराष्ट्र : नेवासा ९७, शेवगाव ६७, गगणबावडा ३७, अक्कलकुवा ६१, शहादा २९, चंदगड ४९.५, आटपाडी ५१, मंगळवेढा ५८.  मराठवाडा : गंगापूर ४३, वसमत ४२,शिरूर अनंतपाळ ४५, अर्धापूर ५५, भोकर ४८, बिलोली ६५, देगलूर ३३,  धर्माबाद ६४, मुदखेड ५५, परांडा ४०, तुळजापूर ६५, उमरगा ३०, जिंतूर ३४, मानवत ९७, पालम ३८, पाथरी ८३.  विदर्भ ः आमगाव १९.६, अर्जुनीमोरगाव २०.९, गोरेगाव २८.४