मध्य महाराष्ट्र, मराठवाड्यात आज वादळी पावसाची शक्यता 

पुणे : कोकणात अनेक ठिकाणी पावसाचा मुसळधार पाऊस पडत आहे. मध्य महाराष्ट्रात, मराठवाड्यातही जोरदार, तर विदर्भात हलक्या ते मध्यम सरींनी हजेरी लावली आहे. आज (ता.११) कोकणात पावसाचा जोर कायम राहणार असून, मध्य महाराष्ट्र, मराठवाड्यात तुरळक ठिकाणी मेघगर्जना, विजांसह पाऊस पडण्याची शक्यता हवामान विभागाने वर्तविली आहे. 

गुजरातलगत असलेले कमी दाबाचे क्षेत्र पश्चिमेकडे सरकून गेले आहे. तर मॉन्सूनचा आस असलेला कमी दाबाचा पट्टा हिमालयाच्या पायथ्याकडे सरकला आहे. गोव्यापासून कर्नाटकपर्यंत किनारपट्टीला समांतर कमी दाबाचा पट्टा सक्रिय आहे. ही स्थिती पोषक ठरल्याने कोकणात पावसाचा जोर कायम राहणार आहे. विदर्भात हलक्या पावसाची शक्यता आहे. 

कोकणातील सर्वच जिल्ह्यासह घाटमाथा, धरणांच्या पाणलोटात तुरळक ठिकाणी मुसळधार पाऊस पडण्याची शक्यता आहे. तर उत्तर मध्य महाराष्ट्रातील नाशिक, नंदूरबार, धूळे, जळगाव, मराठवाड्यातील उस्मानाबाद, लातूर, परभणी, बीड, जालना, नांदेड, हिंगोली जिल्ह्यात वादळी मेघजर्गना, विजांसह पावसाच्या सरी कोसळण्याचा अंदाज हवामान विभागाने वर्तविला आहे.