मराठवाड्यात आजही वादळी पावसाची शक्यता 

पुणे: उन्हाचा ताप वाढल्याने सोलापूर, मालेगाव, सांगली, बीड, अकोला येथे तापमान चाळीशी पार गेले आहे. शनिवारी (ता.४) सकाळपर्यंतच्या २४ तासांमध्ये सोलापूर येथे उच्चांकी ४१.० अंश सेल्सिअस तापमानाची नोंद झाली. पावसाला पोषक हवामान असल्याने मराठवाड्यात वादळी पावसाचा, तर विदर्भ, कोकणात तुरळक ठिकाणी हलक्या पावसाचा अंदाज आहे. उन्हाचा चटकाही कायम राहण्याची शक्यता हवामान विभागाने वर्तविली आहे.  पूर्वमोसमी पावसाने उघडीप दिल्याने राज्यात अनेक ठिकाणी तापमान ३७ अंशांच्यावर गेले आहे. दुपारच्या वेळी उन्हाच्या झळा वाढून उकाड्यातही वाढ होत आहे. विदर्भ आणि परिसरावर समुद्र सपाटीपासून २.१ किलोमीटर उंचीवर चक्राकार वारे वाहत आहेत. तर उत्तर महाराष्ट्रापासून कर्नाटकपर्यंत हवेचा कमी दाबाचा पट्टा निर्माण झाला आहे. यामुळे आज (ता.५) मराठवाड्यात मेघगर्जना, विजांसह वादळी पावसाचा, तर कोकण, विदर्भात हलक्या पावसाचा अंदाज हवामान विभागाने वर्तविला आहे.  शनिवारी (ता. ४) सकाळपर्यंतच्या २४ तासांमध्ये राज्यातील विविध ठिकाणचे किमान व किमान (कंसात) तापमान, (अंश सेल्सिअसमध्ये) : पुणे ३८.३, जळगाव ३९.६, कोल्हापूर ३८.७, महाबळेश्‍वर ३२.६, मालेगाव ४०.६, नाशिक ३७.७, निफाड ३७.०, सांगली ४०.०, सातारा ३९.१, सोलापूर ४१.०, डहाणू ३४.१, सांताक्रूझ ३४.१, रत्नागिरी ३४.१, औरंगाबाद ३८.४, बीड ४०, परभणी ३९.५, अकोला ४०.८, अमरावती ३८.८, बुलडाणा ३६.६, ब्रह्मपूरी ३९.०, गोंदिया ३७.६, नागपूर ३७.४, वर्धा ३७.९.