राज्यात वादळी पावसाचा अंदाज 

पुणे: पूर्व मोसमी पावसाला पोषक हवामान असल्याने आजपासून (ता.१६) कोकण, मध्य महाराष्ट्र, मराठवाड्यात तुरळक ठिकाणी मेघगर्जना, विजांसह वादळी पाऊस पडण्याची शक्यता आहे. उन्हाचा वाढलेला चटकाही कायम राहण्याचा अंदाज हवामान विभागाने वर्तविला आहे. गुरूवारी (ता.१७) सकाळपर्यंतच्या २४ तासांमध्ये जळगाव येथे उच्चांकी ४३.४ अंश सेल्सिअस तापमानाची नोंद झाली आहे.  मध्य महाराष्ट्रातील जळगाव, धुळे, मालेगाव, नाशिक, निफाड, सोलापूर, मराठवाड्यातील औरंगाबाद, बीड, परभणी, विदर्भातील अकोला, अमरावती, ब्रह्मपुरी, चंद्रपूर, नागपूर, वाशिम, वर्धा येथे कमाल तापमान चाळीशीपार गेल्याने उन्ह अधिकच तापदायक ठरत आहे. तसेच पुणे, सांगली, सातारा, बुलडाणा येथेही उन्हाचा चटका चांगलाच वाढला आहे. कमाल तापमानात झालेली वाढ कायम राहण्याची शक्यता आहे.  मध्य प्रदेशापासून विदर्भ, मराठवाडा उत्तर कर्नाटकपर्यंत हवेचा कमी दाबाचा पट्टा सक्रिय आहे. यामुळे आजपासून (ता.१७) राज्यात तुरळक ठिकाणी पावसाचा अंदाज आहे. मध्य महाराष्ट्र, मराठवाडा, विदर्भात जोरदार वारे, मेघगर्जना, विजांसह वादळी पाऊस, तर कोकणात हलक्या पावसाला पोषक हवामान असल्याचे हवामान विभागातर्फे सांगण्यात आले. 

गुरूवारी (ता. १६) सकाळपर्यंतच्या २४ तासांमध्ये राज्यातील विविध ठिकाणचे कमाल तापमान (अंश सेल्सिअसमध्ये) : पुणे ३९.८, जळगाव ४३.४, धुळे ४२.२, कोल्हापूर ३८.१, महाबळेश्‍वर ३१.७, मालेगाव ४२.२, नाशिक ४०.५, निफाड ४०.०, सांगली ३८.२, सातारा ३८.१, सोलापूर ४१.१, डहाणू ३५.५, सांताक्रूझ ३४.६, रत्नागिरी ३३.८, औरंगाबाद ४०.२, बीड ४१.६, परभणी ४१.९, अकोला ४३.४, अमरावती ४१.४, बुलडाणा ३९.८, ब्रह्मपुरी ४०.५, चंद्रपूर ४१.६, गोंदिया ३९.८, नागपूर ४०.६, वाशीम ४२.२, वर्धा ४१.६.