मुसळधार पावसाचा अंदाज 

पुणे : अरबी समुद्रातील कमी दाबाच्या क्षेत्राची तीव्रता वाढली आहे. मात्र लक्षद्वीपजवळ तीव्र कमी दाबाचे क्षेत्र तयार झाल्याने आज (ता. १५) या कमी दाबाच्या क्षेत्राचे चक्रीवादळात रूपांतर होण्याची शक्यता आहे. पुढील चार ते पाच दिवस तमिळनाडू, केरळ, गोवा, कोकण किनारपट्टी, गुजरात, राजस्थान या भागांत विजांच्या कडकडाटासह मुसळधार पाऊस पडण्याचा अंदाज आहे. तर कोकण किनारपट्टीजवळील नागरिकांना सुरक्षित ठिकाणी स्थलांतरित करण्याच्या सूचना सरकारने दिल्या आहेत. 

गेल्या तीन दिवसांपासून अरबी समुद्रात अतितीव्र कमी दाबाच्या क्षेत्राचा प्रभाव वाढत आहे. हे क्षेत्र शुक्रवारी (ता. १४) अमिनीदेवीपासून नैर्ऋत्याकडे ८० किलोमीटर, कन्नूरपासून ३६०, तर वेरावलपासून ११७० किलोमीटर अंतरावर होते. त्यामुळे ताशई ५५ ते ६५ किलोमीटर वेगाने वारे वाहत होते. आज हे चक्रीवादळ तयार झाल्यानंतर ताशी वेग वाढत जाणार आहे. त्यामुळे वाऱ्याचा वेग ताशी ७० किलोमीटर वरून हळूहळू वाढत जाऊन तो १०० किलोमीटर जाईल. उद्या चक्रीवादळाची तीव्रता वाढल्यानंतर ताशी वेग ११० वरून १४० किलोमीटर, तर सोमवारी (ता. १७) अतितीव्र चक्रीवादळामुळे १५० ते १६० किलोमीटर वेगाने वारे वाहतील. मंगळवारी (ता.१८) सकाळी अतितीव्र स्वरूपातील चक्रीवादळ गुजरात किनारपट्टीजवळ पोहोचण्याची शक्यता आहे.  सध्या या चक्रीवादळामुळे राज्यातील प्रशासन सतर्क झाले आहे. मच्छीमारांनी मासेमारीसाठी समुद्रात न जाण्याचा इशारा दिला आहे. तसेच राज्यातही त्याचा काहीसा परिणाम होत असून, पश्‍चिम महाराष्ट्रात वातावरण ढगाळ झाले आहे. त्यामुळे उकाड्यात वाढ होऊन कमाल तापमानात कमीअधिक झाले आहे. या चक्रीवादळामुळे चार ते पाच दिवस कोकण किनारपट्टी व मध्य महाराष्ट्रादरम्यान अनेक ठिकाणी विजांच्या कडकडाट व मेघगर्जना, वादळी वाऱ्यांसह जोरदार पाऊस पडेल. त्यामुळे वातावरणात चांगलेच बदल होतील. शुक्रवारी (ता. १४) सकाळी चोवीस तासांत विदर्भातील चंद्रपूर येथे सर्वाधिक ४२.८ अंश सेल्सिअसची नोंद झाली आहे.  राज्यात या जिल्ह्यांमध्ये होणार पूर्वमोसमी पाऊस  शनिवार ः रायगड, रत्नागिरी, सिंधुदुर्ग, धुळे, नंदुरबार, नाशिक, नगर, पुणे, सातारा, सांगली, सोलापूर, कोल्हापूर, सातारा, संपूर्ण मराठवाडा व विदर्भ  रविवार ः संपूर्ण महाराष्ट्र  सोमवार ः पालघर, भंडारा, बुलडाणा, वाशीम, यवतमाळ  मंगळवार ः अकोला, बुलडाणा, वाशीम, यवतमाळ  शुक्रवारी (ता. १४) सकाळपर्यंतच्या २४ तासांत विविध शहरांतील कमाल तापमान (अंश सेल्सिअसमध्ये)