विदर्भात जोरदार पावसाचा इशारा

पुणे: बंगालच्या उपसागरात सक्रिय असलेल्या कमी दाब क्षेत्राच्या प्रभावामुळे आज (ता. १४) विदर्भात जोरदार ते अति जोरदार पाऊस पडण्याचा इशारा देण्यात आला आहे. तर कोकण आणि मध्य महाराष्ट्राच्या घाटमाथ्यावरही तुरळक ठिकाणी जोरदार सरी कोसळण्याची शक्यता हवामान विभागाने वर्तविली आहे. मंगळवारी (ता. १३) सकाळपर्यंतच्या २४ तासांमध्ये विदर्भातील गडचिरोली येथे सर्वाधिक १३० मिलिमीटर पावसाची नोंद  झाली. चार-पाच दिवसांपासून राज्याच्या अनेक भागांत पाऊस उघडला आहे. कोकण, मध्य महाराष्ट्रात काही ठिकाणी हलक्या ते मध्यम सरी पडत आहेत. मराठवाड्यात पावसाची मुख्यत: उघडीप आहे. बंगालच्या उपसागरात तयार झालेले कमी दाबाचे क्षेत्र पश्चिम बंगाल आणि ओडिशा परिसरात होते. या कमी दाब क्षेत्राची तीव्रता वाढत असून, या प्रणालीच्या प्रभावामुळे मंगळवारी (ता. १३) सकाळपासूनच विदर्भात ढगांनी दाटी केली होती.  आज (ता. १४) मध्य भारतातील राज्यांमध्ये पावसाचा जोर अधिक राहणार आहे. तर विदर्भातील नागपूर, वर्धा, अकोला, अमरावती जिल्ह्यात काही ठिकाणी अतिजोरदार तर उर्वरीत विदर्भात तुरळक ठिकाणी जोरदार पावसाची शक्यता आहे. कोकणातील रायगड, रत्नागिरी, मध्य महाराष्ट्रातील पुणे, सातारा, कोल्हापूर जिल्ह्यांच्या घाटमाथ्यांवर तुरळक ठिकाणी जोरदार सरी पडतील. तर मराठवाड्यासह राज्याच्या उर्वरित भागात हलक्या पावसाचा अंदाज हवामान विभागाने वर्तविला आहे.   मंगळवारी (ता. १३) सकाळपर्यंतच्या २४ तासांमध्ये राज्यात विविध ठिकाणी पडलेला पाऊस, मिलिमीटरमध्ये (स्रोत - हवामान विभाग) : कोकण : मालवण ९०, दोडमार्ग ४०, भिरा, सावंतवाडी ३०, वेंगुर्ला, पोलादपूर, माथेरान, हर्णे, सुधागड प्रत्येकी २०. मध्य महाराष्ट्र : महाबळेश्वर ४०, पन्हाळा ३०, गगणबावडा, चंदगड, शाहूवाडी, पौड, लोणावळा राधानगरी २०. मराठवाडा : दवणी २०, जाफराबाद १०.विदर्भ : गडचिरोली १३०, अरमोरी १००, कुरखेडा, धानोरा प्रत्येकी ९०, देसाईगंज ७०, सावळी, लाखंदूर, अर्जुनी मोरगाव, मुलचेरा, भामरागड प्रत्येकी ४०, कोर्ची, चामोर्शी, मूल प्रत्येकी ३०, एटापल्ली, आहेरी, ब्रम्हपुरी, गोंडपिंपरी, सिंदेवाही प्रत्येकी २०.घाटमाथा : शिरगाव ६०, आंबोणे, डुंगरवाडी, दवडी प्रत्येकी ५०.