विदर्भात वादळी पावसाचा अंदाज

पुणे: कोकण, घाटमाथ्यावर मॉन्सूनचा पाऊस सक्रिय असल्याने जोरदार सरी येत आहेत. तर उर्वरित महाराष्ट्रात हलक्या ते मध्यम स्वरूपाचा पाऊस पडत आहे. आज (ता. १०) कोकणात तुरळक ठिकाणी जोरदार पावसाची शक्यता आहे. विदर्भात वादळी पावसाला पोषक हवामान आहे. तर उर्वरित महाराष्ट्रात काही ठिकाणी हलक्या ते मध्यम पावसाचा अंदाज हवामान विभागाने वर्तविला आहे.  गुजरात आणि परिसरावर असलेल्या कमी दाब क्षेत्राची तीव्रता कमी होत असून, ते पश्‍चिमेकडे सरकून गेले आहे. तर मॉन्सूनचा आस असलेल्या कमी दाबाच्या पट्ट्याची पूर्वेकडील बाजू हिमालयाच्या पायथ्याकडे सरकली आहे, हा आस पंजाबच्या अमृतसरपासून बिहारच्या भागलपूरपर्यंत विस्तारला आहे. तर पश्‍चिम किनाऱ्याला समांतर असलेला हवेचा कमी दाबाचा पट्टा कर्नाटकपासून लक्षद्वीप बेटांपर्यंत कायम आहे.  कोकणात सर्वदूर पाऊस पडणार असून, दक्षिण कोकणातील सिंधुदुर्ग, रत्नागिरीत मुसळधार पावसाची शक्यता आहे. घाटमाथा धरणांच्या पाणलोटात पावसाची संततधार कायम राहणार आहे. मध्य महाराष्ट्र, मराठवाड्यातही अधूनमधून पावसाच्या हलक्या ते मध्यम सरी येणार आहेत. तर पूर्व विदर्भातील भंडारा, गोंदिया, गडचिरोली, चंद्रपूरमध्ये मेघगर्जना, विजांसह वादळी पाऊस पडण्याचा अंदाज हवामान विभागाने वर्तविला आहे.