पुणे : सकाळी उन्हाचा चटका वाढून, दुपारनंतर स्थानिक वातावरणात वेगाने बदल होत राज्यात वादळी पाऊस हजेरी लावत आहे. कमी कालावधीत पडणाऱ्या पावसाने काही काळात सर्वत्र पाणीच पाणी होत आहे. आज (ता. ३१) कोकण, मध्य महाराष्ट्र, विदर्भात मेघगर्जना, विजांसह वादळी पावसाचा अंदाज आहे. तर कोकणात तुरळक ठिकाणी मुसळधार पावसाचा इशारा हवामान विभागाने दिला आहे. अरबी समुद्रातील ‘क्यार’ वादळाची तीव्रता कमी होत असून, ओमानच्या किनाऱ्यालगत ‘सलालाह’पासून ९३० किलोमीटर पूर्वेकडे घोंगावत आहे. दक्षिणेकडे वळून सोकोट्रा बेटाकडे जाताना चक्रीवादळाची तीव्रता आणखी कमी होणार आहे. यातच केरळच्या किनाऱ्यालगत लक्षद्वीप व मालदीव बेटांजवळ तीव्र कमी दाबक्षेत्राची निर्मिती झाली आहे. गुरुवारपर्यंत (ता. ३१) या कमी दाबक्षेत्राची तीव्रता वाढून, कमी तीव्रतेचे वादळ (डीप डिप्रेशन) तयार होण्याचे संकेत आहेत. या प्रणालीमुळे केरळ, कर्नाटकच्या किनाऱ्यालगत तशी ५५ ते ६० किलोमीटर वेगाने वारे वाहून, समुद्र खवळणार आहे. दिवसभर उन्हाचा चटका वाढल्याने स्थानिक वातावरणात बदल होत, ढगांची निर्मिती होत आहे. सायंकाळी किंवा रात्री उशिरा विविध भागात वादळी वारे, मेघगर्जना, विजांसह पाऊस पडत आहे. राज्यात उन्हाचा चटका वाढल्याने राज्यात तापमान तिशीपार गेले आहे. बुधवारी (ता. ३०) सकाळपर्यंतच्या २४ तासांमध्ये ब्रह्मपुरी येथे सर्वाधिक ३५.३ अशं सेल्सिअस तापामनाची नोंद झाली. जवळपास सर्वच प्रमुख ठिकाणी तापमान ३० अंशांच्या पुढे गेले आहे. पुढील काही दिवस दिवसभर ऊन-सावल्यांचा खेळ आणि दुपारंनतर हलक्या ते मध्यम पावसाची शक्यता आहे. बुधवारी (ता. ३०) सकाळपर्यंतच्या २४ तासांमध्ये राज्यातील विविध ठिकाणचे कमाल तापमान, कंसात सरासरीच्या तुलनेत वाढ, घट (अंश सेल्सिअसमध्ये) : पुणे ३१.४ (०.३), जळगाव ३२.० (-२.०), कोल्हापूर ३०.४ (-०.५), महाबळेश्वर २५.२ (-०.३), मालेगाव ३०.२ (-२.५), नाशिक २९.८ (-१.९), सांगली ३१.३ (-०.४), सातारा ३०.१ (०.१), सोलापूर ३२.६ (०.६), अलिबाग ३२.९ (-०.३), डहाणू ३२.९ (-०.४), सांताक्रूझ ३४.५ (०.३), रत्नागिरी ३४.७ (१.४), औरंगाबाद २९.७ (-१.३), परभणी ३०.४ (-१.०), नांदेड ३३.० (०.७), अकोला ३२.२ (-०.४), अमरावती ३१.६ (-०.८), बुलडाणा ३०.६ (०.९), ब्रह्मपुरी ३५.३ (४.०), चंद्रपूर ३२.८ (१.०), गोंदिया ३१.५ (०.०), नागपूर ३२.४ (०.८), वर्धा ३१.८ (०.३), यवतमाळ ३१.० (०.४).
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.