वादळी वारे, पावसाचा रब्बी पिकांना जोरदार तडाखा

नांदेड: रब्बी पिकांची सुगी सुरू असताना वादळी वारे, पूर्वमोसमी पावसामुळे हाती आलेल्या पिकांचे होत्याचे नव्हते होत असल्याने शेतकरी हवालदिल झाले आहेत. नांदेड, परभणी, हिंगोली जिल्ह्यात गेल्या दोन दिवसांंमध्ये वादळी वारे, जोरदार पावसामुळे रब्बी पिके, फळपिके, भाजीपाला पिकाचे नुकसान झाले आहे. नुकसानीचे पंचनामे करुन आर्थिक मदत देण्याची मागणी शेतकऱ्यांनी केली आहे. नांदेड जिल्ह्यातील बिलोली, माहूर, हिमायतनगर आदी तालुक्यात सोमवारी (ता. ९) आणि मंगळवारी (ता. १०) वादळी वाऱ्यासह पाऊस झाला. परभणी जिल्ह्यातील परभणी तालुक्यासह अन्य काही तालुक्यात हिंगोली जिल्ह्यातील कळमनुरी, वसमत तालुक्यात वादळी वाऱ्यासह जोरदार पाऊस झाला. सध्या सुरुवातीला पेरणी केलेल्या ज्वारी, गहू, हरभरा आदी रब्बी पिकांची सुगी सुरू आहे. परंतु उशिरा पेरणी केलेली गहू, ज्वारी पीके अजून शेतात उभी आहेत. वादळी वाऱ्यामुळे हि पिके आडवी झाली आहेत. संत्र्यामध्ये फळगळ, आंब्यामध्ये मोहर गळ झाली आहे. भाजीपाला पिकांचे देखील मोठे नुकसान झाले आहे. बाधित शेतकऱ्यांनी नुकसानीची माहिती कृषी विभागाला कळविण्याबाबत आवाहन करण्यात आले आहे.