राज्यात ठिकठिकाणी जोरदार सरी

पुणे ः राज्यात तुरळक ठिकाणी होत असलेल्या पावसाचा जोर अजूनही कायम आहे. मध्य महाराष्ट्र व मराठवाड्यात अनेक ठिकाणी हलक्या ते मध्यम स्वरूपाचा पडत असला तरी अनेक ठिकाणी शेतांना तळ्याचे स्वरूप आले आहे. काही ठिकाणी अति पावसामुळे भाजीपाला पिके सडली आहेत. अतिवृष्टीमुळे नुकसान झालेल्या पिकांचे पंचनामे करण्याचे कामे सुरू झाले आहेत. कोकणातील रायगड, रत्नागिरी, पालघर जिल्ह्यात अनेक ठिकाणी पावसाचा शिडकावा झाला. सिंधुदुर्ग व ठाणे जिल्ह्यात मध्यम स्वरूपाचा पाऊस पडला. मालवण येथे सर्वाधिक ७४ मिलिमीटर पाऊस पडल्याची नोंद झाली आहे. काही ठिकाणी अतिवृष्टीमुळे शेतात साचले. सांगलीतील आटपाडी तालुक्यात मुसळधार पाऊस झाला. डाळिंब शेतात पाणी साचल्याने फळकुज होण्याची शक्यता आहे. नगर जिल्ह्यातील काही ठिकाणी झालेल्या अतिवृष्टीमुळे ओढ्या नाल्याचे पाणी शेतात शिरल्याने धोक्यात आलेली खरिपाची पिके ओल्या दुष्काळामुळे शेतकऱ्यांच्या हातातोंडाशी आलेला घास हिरावून घेत आहेत. मराठवाड्यातील बीड लातूर, उस्मानाबाद, परभणी, नांदेड जिल्ह्यांत पावसाचा जोर बऱ्यापैकी होता. तर अहमदपूर येथे सर्वाधिक १३१ मिलिमीटर पाऊस पडला असून पिके आडवी झाली. पूर्व विदर्भातील चंद्रपूर, गडचिरोली, वर्धा, यवतमाळ जिल्ह्यात हलका ते मध्यम स्वरूपाचा पाऊस पडत आहे.

शनिवारी (ता.१९) सकाळी आठ वाजेपर्यंत झालेला पाऊस, मिलिमीटरमध्ये ः  (स्त्रोत, हवामान विभाग) कोकण : कुडाळ ४५, वेंगुर्ला ५४.८, शहापूर ५८, मध्य महाराष्ट्र : ओझरखेडा ३१.८, माळशिरस ९९. मराठवाडा : अंबाजोगाई ३१, माजलगाव ४५, रेणापूर ५१, देगलूर ४८,  उस्मानाबाद ४६.१, परांडा ४५.विदर्भ : चंद्रपूर ४७.८, देसाईगंजवडसा ३४, मारेगाव २७.३.