पुणे जिल्ह्यातील पश्चिम भागात पावसाची दमदार हजेरी

पुणे   : जिल्ह्यातील पश्चिम भागात असलेल्या तालुक्यांमध्ये पावसाने दमदार हजेरी लावली आहे. रविवारी (ता. २८) सकाळपर्यंतच्या २४ तासांमध्ये मुळशी, भोर, मावळ, वेल्हा, जुन्नर, खेड तालुक्यांतील १८ मंडळांमध्ये १०० मिलिमीटरपेक्षा अधिक पावसाची नोंद झाली आहे. मावळ तालुक्यातील लोणावळा येथे सर्वाधिक २५८ तर कार्ला येथे २०५ मिलिमीटर, जुन्नर तालुक्यातील राजूर येथे २५३ मिलिमीटर पावसाची नोंद झाली आहे. 

दोन दिवसांपासून पश्चिम भागात पावसाने जोर धरला आहे. पूर्व भागातील शिरूर, हवेली, दौंड, इंदापूर, बारामती आणि पुरंदर तालुक्यात मात्र हलक्या ते मध्यम सरी पडत आहेत. घाटमाथा आणि पश्चिम भागात सुरू असलेल्या पावसाने नद्या, नाले दुथडी भरून वाहू लागले आहेत. खरिपाच्या पिकांना हा पाऊस लाभदायक ठरणार आहे. मावळ पट्ट्यात भात खाचरे तुडुंब भरल्याने लागवड झालेल्या भात पिकाची जोमदार वाढ होणार असून, शिल्लक क्षेत्रावरील भात लागवडीला वेग येणार आहे.  

रविवारी (ता. २८) सकाळपर्यंतच्या २४ तासांत जिल्ह्यात पडलेला पाऊस (मिलिमीटरमध्ये) : खडकवासला ४०, चिंचवड ४८, पौड १२०, घोटावडे १२५, माले १४०, मुठा ११२, पिरंगूट १२१, भोर ४७, भोलावडे १६५, नसरापूर ४१,आंबवडे ५६, संगमनेर ६०, निगुडघर ९५, वडगाव मावळ ११६, तळेगाव ९६, काळे १६०, कार्ला २०५, खडकाळा १६९, लोणावळा २५८, शिवणे ९८, वेल्हा १९३, पानशेत १५०, विंझर ९७, आंबवणे ४२, जुन्नर ७०, राजूर २५३, डिंगोरे १२२, आपटाळे १०५, ओतूर ५४, वाडा ११०, राजगुरूनगर ४६, कुडे १३०, पाईट ८०, चाकण ४०, कण्हेरसर ५४, कडूस ६८, घोडेगाव ४९, आंबेगाव (डिंभे) ९९.   धरणांच्या पाणलोट क्षेत्रात जोरदार हजेरी जिल्ह्यातील सर्व प्रमुख धरणांच्या पाणलोट क्षेत्रात जोरदार पाऊस सुरूच आहे. पाणलोटातून वाहणारे नदी, नाले दुथडी भरून वाहत असल्याने धरणांमधील पाणीसाठ्यात वाढ होत आहे.

जिल्ह्याच्या धरण क्षेत्रात झालेला पाऊस (मिलिमीटरमध्ये) : टेमघर ११२, वरसगाव १४८, पानशेत १५०, खडकवासला ४०, पवना १६०, कासारसाई ५६, मुळशी १४०, कळमोडी ११४, चासकमान ६१, भामा आसखेड ७४, आंद्रा ९५, वडीवळे १८०, गुंजवणी ११८, भाटघर ६८, नीरा देवघर ९५, वीर ५, नाझरे १९, पिंपळगाव जोगा ४७, माणिकडोह ६७, येडगाव ४६, वडज ६२, डिंभे ९९.