सांगली जिल्ह्यात अतिवृष्टीमुळे सोयाबीनच्या उताऱ्यात घट

सांगली : महापुरात खरीप पिकांचे मोठे नुकसान झाले. शेतकऱ्यांवर अस्मानी संकट कोसळले. त्यातून बचावलेल्या सोयबीन पिकांची काढणी शेतकऱ्यांनी सुरू केली आहे. मात्र, उतारा कमी मिळत असल्याने शेतकऱ्यांना आर्थिक फटका बसू लागला आहे.

जिल्ह्यात ३८ हजार ५०६ हेक्टरवर सोयाबीनचा पेरा झाला होता. पीक चांगले बहरू लागले होते. मात्र, ऑगस्ट महिन्यात जिल्ह्यात महापूर आला. यामुळे पिकात पाणी साचून राहिले होते. गेल्या आठवड्यात जिल्ह्यात परतीचा पाऊस सुरू झाला. त्यामुळे सोयाबीनची काढणी रखडली होती. पावसाची उघडीप मिळाल्याने शेतकरी सोयाबीन काढणीची लगबग सुरू झाली आहे. एकाच वेळी सोयाबीनची काढणी आली आहे. यामुळे मजूर वेळेत मिळत नाही. त्यामुळे शेतकरी पाच ते सहा दिवस अगोदरच मजुरांचे नियोजन करत आहेत. सोयाबीन काढणीला एकरी  ३००० ते ३२०० रुपये घेतले जात आहेत.

यंदा सरासरीपेक्षा अधिक पाऊस झाला. शेतात पाणीसाचून राहिले होते. त्यामुळे पिकाची वाढ अपेक्षित झाली नाही. त्याचा फटका उत्पादनावर झाला आहे. गेल्यावर्षी सरासरी एकरी १२ ते १५ क्विंटल उत्पादन मिळाले होते. मात्र, या महापुरामुळे एकरी ९ ते १० क्विंटल उत्पादन मिळत असल्याचे शेतकऱ्यांनी सांगितले.

मळणी महागली  सातत्याने डिझेलचे दर वाढत असल्याने ट्रॅक्टर मालकांनी मळणीचे दर वाढविले आहेत. गेल्या वर्षी एका पोत्याला १५० रुपये असा दर शेतकऱ्यांकडून घेतला जात होता. या वर्षी ५० रुपयांनी वाढ केली असून आता एका पोत्याला २०० रुपये असा दर आहे.