आगळगाव परिसरात गारांचा पाऊस 

ढालगाव, जि. सांगली : आगळगाव (ता. कवठेमहांकाळ) येथील परिसरात गुरुवारी (ता. १६) दुपारी सुमारे अर्धा तास गारांचा पाऊस झाल्याने बेदाणा शेडवर टाकलेल्या बेदाण्याचे मोठ्या प्रमाणावर नुकसान झाले आहे. त्यामुळे बेदाण्याचा दर्जा घरण्याची शक्यता आहे. पाऊस आगळगाव, शेळकेवाडी, केरेवाडी व कुचीच्या काही भागात पाऊस झाला आहे. पावसाने शेतातील बांध भरून गेले आहेत. 

‘कोरोना’ विषाणूच्या संसर्गाने लाॅकडाऊन करण्यात आले आहे. सद्यःस्थितीत द्राक्षाला मागणी नसल्याने शेतकऱ्यांनी मोठ्या प्रमाणावर बेदाणा तयार करण्यासाठी आगळगाव, शेळकेवाडी येथील भागातील शेडवर टाकलेला आहे. आणि नेमकं याच भागात दुपारी जोरदार पाऊस व गारा पडल्या आहेत. यामुळे बेदाणा तयार करण्यासाठी टाकलेला माल भिजला आहे. तर काही शेडचे नुकसान झाले आहे. यामुळे शेतकऱ्यांचे लाखो रुपयांचे नुकसान झाले आहे. 

आगळगाव हद्दीत शेतकरी संघटनेचे महेश खराडे यांच्या मदतीने दहा शेतकऱ्यांनी पंचेचाळीस हजार पेटी माल टाकला आहे. आगळगाव व शेळकेवाडी भागात चाळीसवर शेड आहेत. भागात काही जणांचे ज्वारीची पिके काढायची आहेत. काहींनी काढून शेतात टाकली आहेत. ती भिजून गेली आहेत. 

शेतकऱ्यांना पुराणे मारले. आता ‘कोरोना’ने संपविले. पावसाने मोठ्या प्रमाणावर बेदाणा काळा पडतो. त्यामुळे मालाला दर येत नाही. शेतकऱ्यांनी जगायचे कसे, असा प्रश्न पडला असून प्रशासनाने पंचनामे करून नुकसान भरपाई द्यावी.  - महेश खराडे,  जिल्हा अध्यक्ष स्वाभिमानी शेतकरी संघटना