पुणे जिल्ह्यात बहुतांशी भागांत जोरदार पाऊस

पुणे ः पुणे जिल्ह्यातील बहुतांशी भागांत परतीच्या पावसाने जोरदार हजेरी लावली. पुण्यातील कोथरूड येथे सर्वाधिक ७४ मिलिमीटर पाऊस पडल्याची नोंद झाली. यामुळे अनेक ठिकाणी झाडे पडली होती, तर काही ठिकाणी रस्ते भरून वाहत होते. जिल्ह्यातील अनेक ठिकाणी पावसाने उघडीप दिली असली तरी रब्बी पिकांच्या तयारीसाठी हा पोषक पाऊस असल्याने शेतकऱ्यांमधून समाधान व्यक्त करण्यात येत होते.

परतीच्या पावसाने वाटचाल सुरू केली आहे. त्यातच आॅक्टोबर हीट वाढल्याने वातावरणात सकाळपासून उकाड्यात वाढ झाली होती. मात्र, गेल्या दोन ते तीन दिवसांपासून कमी दाबाचे क्षेत्र तयार होत असल्याने हवामान अधूनमधून ढगाळ होते. बुधवारी (ता. ९) सकाळपासूनच उन्हाचा चटका वाढला होता. दुपारनंतर अचानक ढग जमा झाल्याने दुपारी पाच वाजेपासून जिल्ह्याच्या काही भागात मेघगर्जनेसह जोरदार पाऊस पडला. तर अनेक ठिकाणी मध्यम पाऊस पडला असून तुरळक ठिकाणी हलक्या स्वरूपाचा पाऊस पडला.

सध्या खरीप हंगामातील पिकांची काढणी सुरू असून अनेक ठिकाणी रब्बीची तयारी सुरू झाली आहे. त्यातच हा पाऊस रब्बीसाठी पोषक असल्याने अनेक ठिकाणी जोरदार सरी बरसत आहेत. हवेली तालुक्यातील खडकवासला परिसरातही धो धो पाऊस पडला असून गुरुवारी सकाळी आठ वाजेपर्यंत येथे ७१ मिलिमीटर पाऊस पडला. तर पुणे शहर २१.३, खेड शिवापूर २०, भोसरी १२, कळस १३ मिलिमीटर पाऊस पडला. तर मुंढवा, थेऊर, उरुळी कांचन, हडपसर, चिंचवड हलका पाऊस पडला. 

मुळशी तालुक्यातील पिंरगुट ४० मिलिमीटर पाऊस पडला. तर पौड १९, घोटावडे २०, थेरगाव ३५, माले १२, मुठा २० मिलिमीटर पाऊस पडला. भोर तालुक्यातील बहुतांशी भागांत जोरदार पाऊस पडला. तर नसरापूर येथे सर्वाधिक ५७ मिलिमीटर पाऊस पडला. तर किवडी ४५, वेळू ४०, आंबवडे १९, भोर ३८, भोलावडे १४, संगमनेर ५४, निगुडघर १२ मिलिमीटर पाऊस पडला. मावळमधील खडकाळा येथे १२ मिलिमीटर पाऊस पडला. तर तळेगाव, काळे कॉलनी, लोणावळा, शिवणे येथे हलका पाऊस पडला. 

वेल्हा तालुक्यातील आंबवणे येथे ३२ मिलिमीटर पाऊस पडला. तर वेल्हा शहरात १४, पानशेत २५, विझर १९ मिलिमीटर पाऊस पडला. तर जुन्नर शहरात २० मिलिमीटर पाऊस पडला असून अनेक भागात पावसाने उघडीप दिली होती.