नांदेड, हिंगोली, परभणी जिल्ह्यांत सर्वदूर पाऊस

नांदेड : नांदेड, परभणी, हिंगोली जिल्ह्यांत सलग पाचव्या दिवशी पावसाने सर्वदूर हजेरी लावली. या तीन जिल्ह्यांतील ३० तालुक्यांतील १४९ मंडळांत बुधवारी (ता. ३१) सकाळी आठपर्यंतच्या २४ तासांत हलका ते जोरदार पाऊस झाला. नांदेड, हिंगोली जिल्ह्यांत पावसाचा जोर अधिक राहिला. त्यामुळे काही मंडळांतील ओढे, नाले, नद्या प्रवाहित झाल्या; परंतु परभणी जिल्ह्यात रिमझिम पावसाने आंतरमशागतीची कामे खोळंबली. बुधवारी दुपारपर्यंत अनेक मंडळांत ऊन-पावसाचा खेळ सुरू राहिल्याचे चित्र पाहायला मिळाले.

नांदेड जिल्ह्यातील १६ तालुक्यांतील ८० मंडळांत मध्यम ते जोरदार पाऊस झाला. माहूर, किनवट, हिमायतनगर, अर्धापूर, हदगाव, कंधार, भोकर तालुक्यांतील मंडळांमध्ये पावसाचा जोर होता. माहूर तालुक्यातील वाई, वानोळा, सिंदखेड मंडळामध्ये दमदार पाऊस झाला. देगलूर तालुक्यात मोठ्या पावसाची गरज आहे.

परभणी जिल्ह्यातील सर्व ९ तालुक्यांतील ३९ मंडळामध्ये हलका पाऊस झाला. जिल्ह्यात गेल्या पाच दिवसांपासून पाऊस सुरू आहे. परंतु काही मंडळे वगळता बहुतांश मंडळात रिमझिम सुरू आहे. त्यामुळे खरीप पिकांतील खुरपणी, कोळपणी, वखरणी आदी आंतरमशागतीची कामे खोळंबली आहेत. अधूनमधून रिमझिम पावसाच्या सरी येत असल्याने फवारणीदेखील करता येत नसल्याची स्थिती आहे. भीज पाऊस पडत असल्याने जमिनीमधील ओलावा वाढण्यासाठी मदत होत आहे. परंतु मोठ्या पावसाअभावी ओढे, नाले, नद्या अद्याप कोरड्या आहेत. 

हिंगोली जिल्ह्यातील सर्व ५ तालुक्यांतील ३० मंडळांमध्ये हलका ते जोरदार पाऊस झाला. मंगळवारी दुपारनंतर काही भागांत जोरदार पाऊस झाल्याने ओढे, नाले, कयाधू नदीला पाणी आले. कळमनुरी सालेगाव रस्त्यावरील सांडस गावाजवळी पूल ओढ्याला आलेल्या पुरामुळे पाण्याखाली गेला.

मंडळनिहाय पाऊस (मिमी.)