रत्नागिरी जिल्ह्यात मुसळधार पाऊस

रत्नागिरी : जिल्ह्यात वेगवान वाऱ्यासह पडणाऱ्या मुसळधार पावसामुळे जगबुडी, काजळी नद्यांना पूर आला आहे. काजळीच्या पुरामुळे चांदेराई बाजारपेठेत पाणी शिरले होते. सुदैवाने मोठे नुकसान झालेले नाही. बावनदीचे पाणी माखजन बाजारपेठेत शिरले.

मंगळवारी सकाळी ८.३० वाजेपर्यंतच्या २४ तासांत सरासरी ९२.७१ मिलिमीटरमी पावसाची नोंद झाली आहे. विविध ठिकाणी झालेली पावसाची नोंद मिलिमीटरमध्ये ः मंडणगड १०२.३०, दापोली ७०.८०, खेड ९८.६०, गुहागर ११०.६०, चिपळूण ८३.६०, संगमेश्वर १४२.३०, रत्नागिरी ३३.३०, राजापूर ६०.३०, लांजा ६५.८० पावसाची नोंद झाली आहे.

सोमवारी रात्रीपासून संततधार पाऊस सुरू आहे. रात्री उशिरा आणि सकाळीही पावसाबरोबर सोसाट्याचा वारा सुटला होता. जगबुडी नदी, काजळी नदी आदींनी धोक्याची पातळी ओलांडली  आहे. रत्नागिरी तालुक्यातील चांदेराई पुलाला काजळी नदीच्या पुराचे पाणी लागले. पाणी वाढू लागल्याने बाजारपेठ भागातील व्यापारी व रहिवाशांनी रात्र जागून काढली. मंगळवारी सकाळी बाजारपेठ भागातही पाणी भरू लागले आहे. तसेच कोरोनामुळे चार महिने बाजारपेठ बंद होती. आता पुरामुळे व्यापारी वर्गाचे मोठे नुकसान होणार आहे. व्यापाऱ्यांनी आपले साहित्य, माल सुरक्षित स्थळी नेला आहे.

राजापूर, संगमेश्‍वर आदी भागात जोरदार पाऊस पडत असल्याने तेथील जनजीवन विस्कळीत झाले आहे. पावसाचा अजून कायम असल्याने जिल्हा प्रशासनाने नदी काठावरील गावांना सतर्कतेचा इशारा दिला आहे. समुद्राला उधाण असल्याने किनारी भागातील गावांनाही सतर्कतेचा इशारा प्रशासनाने दिला आहे. जिल्ह्यात काही ठिकाणी पडझड झाली आहे. बावनदीचे पाणी माघझन बाजार पेठेत घुसले. किनारी भागाततील भातशेती पाण्याखाली गेली आहे. मच्छिमार यांनी समुद्रात जाऊ नये, असा इशारा हवामान विभागाकडून देण्यात आला आहे.